Цісарьова атака

Од 1-го септембра минувшого року, коли є початок церьковного року, Україньска ґрекокатолицька церьков і Православна церьков Україны ідуть за такзваным новоюліаньскым календарьом. Мукачовска ґрекокатолицька єпархія, русиньска церьков свого права, вырішыла прияти ґриґоріяньскый календарь.

Як час вказує, календарьна реформа, котру прияла Мукачовска єпархія, стала лем далшым інштрументом україньской церьковной політікы, жебы єй атаковати, а найліпше зничіти єй окреме існованя.

Не малу роль в тім знова хоче грати і портал Закарпаття оналйн, котрый веде Олег Диба, Русинам доста познатый україньскый шовініста і антірусиньскый пропаґандіста. Якраз тот портал вже не раз приніс „сензації“ односно русиньского руху, котры го мали діскредітовати, а не раз вже на тім порталі были і статі, котры крітіковали Мукачовску єпархію, яка за думками авторів тых статей так само є „сепаратістічнов“.

Но і хто бы не схосновав сітуацію, коли не вшыткы спокійны суть з календарьнов реформов, гейже?

Што до особного погляду на календарьну реформу, існують два календарі. Юліаньскый, котрый нам є історічно близкый, але не є точный у „рахованю часу“, зато все по якымсь часі мусить придати ся далшый день розділу, а пак ґриґоріяньскый, котрый є точный, но і в русиньскых середовисках, де вже давно календарьна реформа перешла, бере ся як штось, што не є наше. Але реално суть лем дві можности. Іти за новым або іти за старым календарьом.

І зато, кедь уж має прийти до даякой реформы календаря, пак то якраз Мукачовска єпархія зробила правилно. Покля не хочеме Пасху по новому, пак бы не мало быти ани Рождество по новому. Не дасть ся жыти так, же часть драгы ідеме як в Европі, а часть як у Великобрітанії, бо на драгах буде хаос.

Такзваный новоюліаньскый календарь, кедь правду казати, є компроміс, котрый практічно не фунґує, а його нефункчность вказує ся наприклад і в тім, же можуть выйти рокы, коли ани не є піст перед праздником святых апостолів Петра і Павла, але тото уж якось доґматікам, котры не припустять „католицьку“ Пасху, не перешкаджать.

Но вернийме до темы. То, же Мукачовска єпархія вырішыла перейти на ґриґоріяньскый календарь, уж веце раз было темов ґлосованя наймудрішых в тій справі. Наприклад мав о тім статю Олександр Гаврош на порталі україньского Радіо Свобода, а простор на тоту тему дає і портал Закарпаття онлайн.

О календарьнім „сепаратізмі“ писав Віктор Лендєл уж в авґусті минувшого року, а в януарі того року придав статю „о яничарах в рясах“, де так само крітікує єпархію в повязаню з календарьом, бо „не вшыткы Українці“ будуть святковати вєдно Пасху.

Но і початком фебруара непідписана статя, якбач автора Дибы, пише о тім, як ґрекокатолици Закарпатьской области написали петіцію, жебы святковати Великдень вєдно з Українов.

Мукачовска єпархія днесь омного веце потребує підпору нас, русиньскых ґрекокатоликів.

Я розумію, же зо змінов календаря прийдуть і люди, котры з тым не суть согласны. Ґрекокатолицька церьков у бывшій Чехословакії тым перешла, а так само то не было легке. Але при даній онлайн петіції мі то прийде дакус чудне.

Бо кедь посмотрите на тоту петіцію, не найдете під куртым текстом жадных офіціалных сіґнатарів – ініціаторів, котры єй зорґанізовали, до часу, коли є писаный тот коментарь, єй підписало лем 305 людей, рахує ся, же єпархія має коло 320 000 віруючіх, но а кедь перейдете підписы, векшына з них є анонімізована, підписуючі не хотіли публіковати своє імя.

Зато меджі тыма, што публіковали свої даны, є окрім іншого і Олег Диба, на котрого сайті чудово появили ся і споминаны статі. Но а на офіціалнім профілі порталу Закарпаття онлайн на сіті Facebook адміністратор профілу промптно одповідав на неґатівны коментарі хоснователів сіті, а помагав бунтовати іщі ку векшій ненависти.

Чоловіку, котрый хоць лем дакус є заінтересованый до даной проблематікы, є ясне, же і кедь в єпархії днесь стопроцентно найдеме людей, котры не суть згодны з календарьнов реформов, а не думам, же то єдина єпархія, веце як о неспокійных іде о то, же приятя ґриґоріяньского календаря найвеце злостить україньскых націоналістів. А то не зато, же суть так глубоко закорінены в церькви.

А зато, бо ґриґоріяньскый календарь в єпархії є далше „одрізніня“ ся од Україньской ґрекокатолицькой церькви. А то не пасує їм до той політікы, котру роблять довгы рокы, і котров бы хотіли зничіти окрему русиньску церьков, і тотално єй зукраїнізовати.

На данім порталі або на соціалній сіті найдеме много коментарів, в котрых, єднако як в статях, аж недостойно пише ся на членів правліня єпархії і самого владыку Ніла. Обвинюють ся із деякых коншпірацій, суть то сепаратісты, мадяроны, бізнісмены, вшытко, лем не їх духовны. Такы віруючі пишуть. А рішіньом є, самособов, конечні „приєднати ся“ до україньской церькви.

Їх остатнім арґументом є календарь, но ту можуть быти дакус скламаны. На офіціалнім сайті Львівской архієпархії Україньской ґрекокатолицькой церькви появив ся приговор  митрополіты Ігора, за котрого словами вырішує ся о тім, же по році 2025 і ціла Україньска ґрекокатолицька церьков перейде на повный ґриґоріяньскый календарь. До кого будуть хотіти ся приєднати тоты найвекшы, што днесь кричать проти нашой Мукачовской єпархії, віруючі по далшій зміні? Тадь знова не цілый народ буде святковати вєдно.

Найтраґікомічніше на цілій справі календаря є, же цісарь Ґаюс Юлій, подля котрого юліаньскый календарь є названый, і котрый з хріастіанством ани нич не мав, не міг мати ани зданя о тім, як тота „цісарьова атака“ буде довгы рокы служыти на діліня церькви. А днесь і на далшу пробу о ничіня русиньской єпархії.

Мукачовска єпархія, будьяке рішіня односно календаря наконець прийме, днесь омного веце потребує підпору нас, русиньскых ґрекокатоликів, котрых єпархії суть дітми Матери – Мукачова.

Статя была написана як коментарь „Вступне до контроли“ лемківского радія lem.fm.