Ціны Літературного фонду про Мороховічову-Цвик і Коневала

14-го юна 2016-го року одбуде ся в Братіславі святочне передаваня Цін і Премій словацького Літературного фонду (Literárny fond) за оріґіналну творчость за 2015-тый рік. Літературный фонд буде передавати і Ціну Александра Павловіча, котра належыть русиньскій літературі.

Ціну Александра Павловіча фахова журі за 2015-тый рік уділила двом русиньскым писателям. Єдна ціна попутує Кветі Мороховічовій-Цвик (Квєта Галасова) за поетічну збірку Любовны періпетії, котра вышла іщі у 2014-ім році і выдавательом быв Сполок русиньскых писателів Словеньска. Павловічову ціну здобыв і Миколай Коневал за збірку під назвов З русиньского сердця. Мої стишкы (2). Тота книжка была выдана Русиньсков обродов на Словеньску у 2015-ім році.

Літературный фонд уділює од 2005-го року літературну Ціну Александра Павловіча за найліпшый літературный твор написаный по русиньскы і Премії за літературный твор написаный по русиньскы і за тлумачіня літературного твору зо словацького на русиньскый язык. Ціны і Премії Александра Павловіча суть все удільованы творам, котры вышли у попередніх двох роках. Ціну і Премії уділює выбор Секції про оріґіналну літературу на пропозіцію журі.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА