Ціна Йозефа Мілослава Гурбана про єпіскопа Ґойдіча

Председа Народной рады Словацькой републікы Борис Коллар в понедільок 31-го авґуста 2020-го року інформовав о лавреатах Ціны Йозефа Мілослава Гурбана. In memoriam буде оціненый і русиньскый ґрекокатолицькый єпіскоп, блаженый Павел Петро Ґойдіч.

Председа парламенту буде оцініня удільовати у віторок 1-го септембра, коли є на Словакії державне свято – День конштітуції Словацькой републікы. За Ґойдіча прийде ціну перевзяти владыка Йоан Бабяк, архієпіскоп пряшівскый і метрополіта Словакії.

Сатісфакція церьквам

Коллар на пресконференції повів, же ціну буде передавати людям, котры у своїм жывоті зробили много про Словакію і їй гражданів. В припаді Ґойдіча за його словами іде і о сатісфакцію церьквам, котры в 1940-ых і 1950-ых роках зажыли перзекуцію.

„Є то і особный голд особі, котра в такых тяжкых часах проявила невіроятну особну храбрость і не зломили го ани нелюдьскы условії,“ повів председа словацького парламенту.

Ґрекокатолицька церьков собі тот рік припоминать 60 років од мученицькой смерти єпіскопа. В місяці май того року му была одкрыта памятна табла на вязніці в Леополдові, в котрій і умер. На одкрытю таблы так само брав участь і председа парламенту.

Меджі лавреатами є іщі вызначный словацькы лікарь Владимір Кырчмерій а особности Баршановой револуції 1989-го року Мілан Княжко і Ян Будай. In memoriam дістане оцініня вєдно з Ґойдічом і рабін Роні Кон.

Ціна Йозефа Мілослава Гурбана

Уділіньом державной Ціны Йозефа Мілослава Гурбана оцінює председа Народной рады Словацькой републікы особу або колектів за вынятково вызначны заслугы, резултаты роботы або діяня в области леґіслатівы, права, розвитку демокрації або конштітучности в Словацькій републіці або в гуманітарьній области.

Ціна ся уділює 1-го септембра, хоць председа парламенту може становити і іншый день, а оціненый діставать честный тітул Носитель державной ціны Йозефа Мілослава Гурбана.

Председа парламенту вырішує о уділіню на основі пропозіції Конштітучноправного выбору Народной рады Словацькой републікы, но може єй уділити і без пропозіції. Пропозіції можуть давати парламентному выбору фізічны і юрідічны особы до 31-го мая каждый рік.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА