Ци Лемко досягне Буздыґана Інтернавтів?

Рушыла наступна едиция голосуваня на Буздыґана Інтернавтів 2015, орґанізуваного портальом polska-zbrojna.pl, будучого інтернетовым выданьом місячника «Польска Збройна» («Polska Zbrojna»), котрий творений єст для чытачів заінтересуваных мілітариями, оружом, войском і іх історийом. Посеред зголошеных кандидатів до отриманя Буздыґана Інтернавтів находит ся Лемко – Славко Заґурскій, редактор порталю interia.pl, а колиси тіж редактор радия лем.фм, реалізуючий м.ін. проґрамы на історычны темы («На крылах істориі») та культуральны і музычны авдициі («Раз фрас», «Культуравка»).

Для більшости осіб, котры о воячці і войску мают планне знаня (ту мусиме ся признати, же і мы мусіли дочытати про слово буздыґан), вартат пояснити, од чого ся взяло названя нагороды. Буздыґан то вид обухового оружа, подібного до булавы, котре окрем того, же мало на ціли вдарити противника, своіма желізныма перами роздавляло ціль. Того рода оружа было шыроко хоснуване до кінця середніх віків, але враз з технічным поступом, з причыны явліня ся в войсковым рынштунку огньострільного оружа, стратило мілітарне значыня, остаючы, подбні як булава, або жезл, декорацийным атрибутом – символом власти, або приналежности до высокого стану.

Славко Заґурскій занимат ся журналистыком од 13 років. Першы крокы ставлял в Радию Вроцлав, потім вельо років звязаний был з другыма радийостациями (в тым і з лем.фм). Разом з Петром Карелом выдумали і основали Стоваришыня Лемківской Молодежы «Чуга», котрого Славко был першым ведучым. Был тіж ведучым Світового Форуму Русиньской Молодежы і членом Світовой Рады Русинів. Актуальні пише для порталю interia.pl, а його улюблены темы то мілітариі і істория, в котрых охочо приближат польскым, предовшыткым, чытачам м.ін. історию Тaлергофу, Руской Народной Республикы Лемків, або ужгородского ансамблю «Русь».

Лемкови прийде ся змагати з выдатныма особами звязаныма з войском, актывныма жолнірями, зато уж сама присутніст помедже такыма персонами єст великым доцініньом, але каждий може помочы здобыти престіжну нагороду Буздыґана Інтернавтів, даючы свій голос на Славка Заґурского, до чого горячо заохочаме. Голосуваня тырват до 12. лютого/фебруара 2016 р. через інтернетовий сайт polska-zbrojna.pl – треба лем подати свій е-майльовий адрес цілю верифікациі.

Буздыґаны мают уж більше як двадцетлітню історию. Лавреатами той престіжной нагороды остают актывны жолніры, воєнны ветераны, професоры, журналисты, дослідникы, фотоґрафы – люде ближе-дале звязаны з войском і шыроко понятом воячком. Выбераны сут комісийом, зложеном з выграных попередньой едициі конкурсу та членами редакциі «Польска Збройна». Єдного лавреата выберают інтернавты, признаючы нагороду Буздыґана Інтернавтів.

Знимкы з приватного архіву Славка Заґурского.