Церкви – ровером через Лемковину

28. мая в лемківскій церкви свв. Космы і Даміана в Бортным, яка тепер являт ся одділом Музею Дворы Карвациянів і Ґладышів в Ґорлицях, буде проходил вернісаж выставы знимок пн. Церкви – ровером через Лемковину. Автором знимок єст Каміль Палюшек. Початок вернісажу о 16.00 год., а выстава потырват до 30. червця/юнія т.р. Вступне дармо.

Каміль Палюшек (родж. 1985 р. в Креници) – на штоден жыє і робит в Ряшові. Єст абсольвентом Выділу Штукы Ряшівского Університету. Фотоґрафійом інтересує ся од молодых років, іщы в школі брал участ в додатковых, позалекцийных фотоґрафічных занятях. Головным мотивом його знимок сут церкви – іх выгляд і зовнішня форма та архітектонічны деталі. Окрем того, фотоґрафує краєвиды. Фотоґрафуючы лемківскы церкви Сандецкого і Низкого Бескідів, К. Палюшек лучыт своє друге гоббі, т.є. ізджыня на ровері. То завдякы ньому дотерат до вшыткых обєктів на Пути Деревяной Архітектуры.

Хоснувателі порталю ЛЕМ.фм мали нагоду уж не раз подивляти красу лемківскых церкви, затриману на знимках Каміля Палюшка – част знимок прикрашало і дополняло выбраны заповіди радийового проґраму Реґістер Забытків (напр. одтинкы про церков в Злоцкым, Дубным, Милику, Андриівці, Бересті і інчых). Окрем того, част знимок можете видіти тіж на фб-профіли К. Палюшка пн. Cerkwie Łemkowskie Beskidów.