«Церкви і іконы Лемковины» в найстаршій лемківскій церкви – фотореляция (фот. П. Басалыґа)

В минулий вікенд на західню част Лемковины – до Поворозника, де стоіт найстарша істнуюча лемківска церков з кінця XVI столітя, пришли честны гості, жебы промувати найновшу книжку Ярослава Ґемзы «Церкви і іконы Лемковины». Стрічу з автором в поворозницкій церкви св. Якова і дальшы акциі, котры пак перенесли ся до Крениці, заповідали сме недавно на нашым портали. Заміреным орґанізаторами было не лем вказати нову книжкову позицию, але – што тішыт – вмістити промоцию величезного і фахового выданя в сучасний лемківскій контекст, получений так з сакральном архітектуром місця, де проходили подіі, як і представліньом лемківской культуры.

Суботнім пополудньом, 1. квітня/апріля 2017 р., орґанізаторы – ряшівскє выдавництво Лібра (выдавця книжкы), і бургомайстер Крениці, др Дариюш Ресько – рішыли зачати стрічу в церкви св. Якова, котрой будова (подля фундацийного напису, поміщеного в олтарній части) скінчыла ся 5. жолтня/октобра 1600 рока. Там присутны мали нагоду своіма очами пізріти на найдавнійшу з істнуючых перлинку лемківского церковного будівництва, дополнену о професийональний выклад Ярослава Ґємзы, котрий з захопліньом розповіл прибывшым о єй істориі, архітектурі, іконах і розписі.

Дальша част промоциі книжкы «Церкви і іконы Лемковины» перенесла ся до Бальовой Салі Старого Здройового Дому в Креници. Отворил єй ґазда курорту – креницкій бургомайстер, тримаючий патронат над акцийом – котрий запросил на сцену артистів: Юлию Дошну, знану лемківску піснярку, од долшого часу выступуючу разом з выдатным польскым лютнистом, Антонийом Пільхом. Лемківско-польскій дует представил пісні записаны фольклористом Оскаром Кольберґом, але несподівано выкликал ґу собі Петра Мурянку. Нич найвыдатнійший сучасний лемківскій творця прочытал своі вершы, з нагоды приближаючых ся його 70. уродин Ю. Дошна і А. Пільх дедикували му його авторску пісню «Балада о дражці», што напевно было, хоц не єдиным, але барз приємным моментом стрічы.

Так і пришол час на головний пункт проґраму – представліня працы Ярослава Ґємзы «Церкви і іконы Лемковины», о котрій шырше оповіл сам автор, выдатний знавця ікон і церковной архітектуры. О його монументальній книзі інформували сме на нашым портали уж не раз, зачынаючы од выдавничой заявкы, через дальшы статі заповідаючы промоцийны стрічы од Лемковины, по Краків, аж і Варшаву. В послідній вікенд автор, враз з выдавцьом і орґанізаторами стрічы, мал дяку прити і до Поворозника/Крениці, чым істо пошырил заінтересуваня не лем о іконах і сакральным будівництві лемківской части Карпатской Руси, але цінным єст і тото, же через запрошыня сучасных лемківскых артистів (як підкрислил ведучий промоцийну стрічу Зиґмунт Сьліва, шеф выдавництва Лібра: высокой ранґы артистів) не забыл о тым, же Лемковина то не лем минуле, але і сучасне. Надієме ся, же і будуче.

Книжку Ярослава Ґємзы «Церкви і іконы Лемковины» мож купити через сайт выдавництва Libra PL, або взяти до рук, приходячы до бібліотекы Руской Бурсы. Нич єй придбате, просиме позерати на знимкы авторства Петра Басалыґы, документуючы обі части суботньой стрічы, за котры авторови сердечно дякуєме.