Церкви і іконы Лемковины – неодолга до купліня

Онедолга до книгарeн трафит монументальна книжка авторства Ярослава Ґємзы пн. Церкви і іконы Лемковины. Публикация чыслила буде коло 700 сторін, більше як 2000 ілюстраций, будучы результатом долгых років роботы.

Перед одданьом книжкы до друку нашли ся черговы унікатовы іконы з колекций зо Львова. Не мож іх было поминути, зато друк ся опізнил, але публикация збогатила ся о дальший вынятковий зміст. Заповідана книжка єст першом публикацийом в істориі, в котрій автор комплетно підходит до церковной штукы з обшыри Лемковины, вміщаючы єй в контекст руско-візантийской штукы. Книжку отверают 4 вступы. Тру першы были написаны через: римокатолицкого, грекокатолицкого та православного духовного, четвертий єст вступом од автора.

Перший розділ тыкат ся візантийской традициі в церковній штуці і архітектурі. Другій єст продолжыньом безцінного допису сперед 30. років, авторства выдатного специялисты в обшыри деревяной архітектуры і чловека, кторий ціле своє жытя посвятил на ратуваня материяльного дідицтва полудньово-східной Польщы, вмерлого в 2009 р. Єжы Тура. Третій розділ односит ся до внутрішнього выпосажыня церкви, іконостасів, ікон, олтарів, авторів стінных розписів. В четвертым поміщено вельо придатных інофрмаций, напр. як чытати даты ци скорочыня на іконах в старо-церковно-славяньскым языку і інчы інскрипциі.

Ярослав Ґємза – выдатний знавця церковной штукы, абсольвент істориі Штукы на Католицкым Люблиньскым Універстеті. Од 25 років єст кєрівником Одділіня Церковной Штукы при Музею Замку в Ланьцуті. Єст автором десяток дописів про церковну штуку, єст редактором вельох науковых робіт, тыкаючых церковной штукы. Єст тіж членом Aрхієпархіяльной Консерваторской Комісиі до Справ Охороны Забытків і Розвитку Церковной Штукы Перемшыльско-Варшавской Грекокатолицкой Архієпархіі, діючой при Митрополитальным Уряді Грекокатолицкого Обряду.

Промоция книжкы Церкви і іконы Лемковины одбуде ся 19-20. листопада/новембра в Ряшові і в Котани, а до книгарен трафит 22. листопада/новембра.