Церков в Квятони з модерным протиогньовым системом

Перед парома днями закінчено консерваторскы і реставраторскы роботы при черговій лемківскій церкви. Тым разом задбано о грекокатолицку церков св. Параскєвы в Квятони. То єден з обєктів ґорлицкого повіту, котрый находит ся на списку ЮНЕСКО.

В понедільок 25. листопада/новембра одбыло ся одобраня консерваторскых і реставраторскых робіт в церкви св. Параскєвы в Квятони. Роботы обнимали інсталяцию модерного систему гашыня огня, тзв. систем FOG, вєдно з системом протигоньовых забезпечынь. Систем автоматичного гашыня пожару, систем FOG, схоснує до гашыня огня низкотискову водну гмлу. Водна гмла выполнят цілый простір обнятый огньом, подібні як ґаз, і барз успішні студит повітря, што тлумит оген нич встигне ся пошырити.

Церков была поділена на штырі секциі до потенцияльнохо гашыня, а дышы сут так розміщены, жебы успішні хоронити вшыткы зовнішні деревяны елементы храму і вежы.

В рамках робіт переведено тіж перегляд даху і елевациі, завдякы чому вытыпували ґонты до выміны. Перед замонтуваньом ґонты заімпреґнувано середком на базі скалчного олію – то спосіб на абсорбуваня воды і занечыщыня.

Церков в Квятони єст єдным з послідніх обєктів зо списку ЮНЕСКО, якы находят ся на обшыри ґорлицкого повіту, котрый выпосажено в систем гашыня FOG. Перша така інсталяция была зреализуваня в 2006 році в костелі св. Филипа і Якова в Санковій. В наступных роках інсталяциі появили ся в костелі св. Михала Архангела в Бінаровій і в церкви Покровы Пресвятой Богородиці в Рыхалді. Того рока закінчено тіж монтуваня систему в церкви св. Михала Архангела в Брунариі.

Кошт інвестициі вынюс 920 тис. зл, з чого векшына походила з урядового фундушу Польскій Лад, а 18 400 зл становил вклад ґорлицкого повіту.

В одобраню робіт участ взяли представникы Воєвідского Уряду Охороны Памятників в Кракові Одділіня в Новым Санчы – Марцін Назімек, староста ґорлицкого повіту Мирослав Вальонґ, віцестароста Марцін Кжеміньскій, выконавця – Якуб Шарек, Мирослав Косовскій і Михал Ковальчык. А од стороны ґаздів присутны были парох о. Вєслав Чая і Марек Фіялковскій.

Фот. powiatgorlicki.pl