Централя ЛЕМ.фм розсвітлена аж на другы села

Мило нам інформувати, што на будинку Руской Бурсы в Ґорлицях, де містит ся тіж редакция медияльной ґрупы ЛЕМ.фм, замонтуваний был реклямовий банер, якій підсвітляний буде каждого вечера.

Банер завішений є під бурсяным дахом, на стіні од ул. Сєнкєвіча в Ґорлицях. Представлят він лоґо ЛЕМ.фм, якє піл рока тому отримало нову візуалізацию. По правій стороні од розтягненого вшыр лоґа находят ся частоты, на якых перше лемківскє радийо надає на рідній земли і чужыні. Рекляма дає інформацию, што ЛЕМ.фм мож слухати на частотах 106,6 МГз (Ґорлиці) та 103,8 МГз (Польковиці). Надієме ся, што тепер в каждым селі буде знатя, де находит ся централя лемківскых медий.

Банер зрыхтували вірны слухаче нашого радия – Мария Квасьний і Юрко Квасьний Нагач, якы ведут реклямову фірму MGM REKLAMY в Бжысках, в підкарпатскым воєвідстві. Не лем зрыхтували они проєкт і конечну продукцию, але – што основне – фінансово підпорили выконаня банера.

Припоминаме, што надале мож слухати ЛЕМ.фм, хоснуючы інтернетовий стрім. Додатково, ден по ден ведений є інформацийний порталь www.lem.fm, якій в будучым році буде про вшыткых чытателів іщы веце інтересуючий.

При нагоді інформуєме, што доступны сут брендовы ґаджеты, якы каждий годен отримати. Кєд лем стрітите нашых редакторів, прим. вчас збераня радийового материялу, або вчас робліня прямых преносів з поєдных фестівалів і ін. подій, годны будете отримати долгописы, рамкы на реєстрациі до авт, наклийкы ци отверачы до напитків і одблесковы припинкы. Вшыткы промоцийны материялы очывидно з лоґо ЛЕМ.фм.

Кєд мате звіданя або хочете отримати дакій подарунок од редакциі – пиште на radio@lem.fm.