Тримайме пястукы – тепер тырват матура з лемківского языка!

Од 9.00 годины през 180 минут, тырват матура з лемківского языка. То уж третій рік, як мож наш язык здавати на найважнійшым еґзаміні в жытю молодого чловека і третій раз нашли ся охочы, жебы до него підыйти. Што більше – того рока перший раз матура здавана буде на розшыреным рівзны. За тым мотузком можете призріти ся цілій специфікациі іспыту, вымагань до него, можете дознати ся што і як єст оцінюване і тіж преконати ся, як выглядат примірний іспыт.

Лемківскій язык мож здавати як додатковий, необовязковий предмет, попри обліґаторийых іспытах з польского, чужого сучасного (як напр. анґлицкій, німецкій, французскій, ітд.) языків, математыкы і єдного додаткового предмету з ґрупы обовязковых, як напр. фізыка, біолоґія, істория, хемія.

Барз сме горды з того, же нашли ся охочы, котры не смотрячы на додатковий труд, стрес і факт, же уж давно могли быти по вшыткых іспытах (бо днес є уж остатній ден матур), добровільні рішили єднак провірити своє знаня лемківского языка. Як можете преконати ся на примірі редакциі лем.фм – матура з лемківского языка може ся до чогоси придати – Северин Косовскій, од недавна член ансамблю лем.фм+, влони писал матуру з лемківского, а днес хоснує язык в практыці при рыхтуваню для Вас вісти на порталь.

Без огляду на результат, уж тепер складаме великы ґратуляциі для одважных пишучых!