Три жены і Мурянка – genius loci

11. едиция Фестівалю на Шляку Деревяной Архітектуры в Малопольщы – Музыка Заклята в Дереві – тырват. Тогорічна інавґурация подіі прошла 11. червця/юнія, а концерты заміряны сут на цілий вакацийний період, значыт до кінця серпня/авґуста. Традицийно фестіваль мат і лемківскы акценты. А взріти і почути іх буде можна уж вчас концерту, якій пройде в найблизшу неділю, 2. липця/юлия.

Єдном з артисток, што барз часто гостит на фестівали Музыка Заклята в Дереві, є Сусанна Яра. В недільне пополудня попри ній на сцені станут іщы дві співачкы – Ганка Вуйцяк та Аґата Сємашко. Дівчата од деякого часу творят артистичне тріо S.H.A. (Сусанна, Ганка, Аґата), якє м.ін. выконує Мурянковы творы.

Каждий з концертів носит своєрідний наголовок. Недільна стріча, на якій почуєме S.H.A., буде проходила під гослом «Галицкiй genius loci». Латиньску фразу тлумачыт ся як «опікунчий дух давного місця». Подля міфолоґіі genius loci то опікунча сила, што спричынят, же простір (або будівля) є своєрідна, выняткова. Концерт тріо S.H.A. пройде в Чермній (тарнівскій повіт) в деревяным костелі св. Мартина, якій датуваний є на 1520 рік.

Тріо в своім репертуарі, дякы каждой з солисток, мат польскы, словацкы, ромскы, украіньскы та лемківскы співанкы. Самособом, Сусанна, яка од парох років занимат ся м.ін. выспівуваньом Мурянковой поезиі, вводит до репертуару як раз лемківскє слово. Серед награных уж першых відеокліпів находит ся першорядна пісня «Посій, же ся посій».