TREBBIA про Михала Бицка

Міджінародный номіначный комітет міджінародного оцініня TREBBIA вырішыв, же тот рік за вклад до діалоґу народных култур дістане спомянуте оцініня і Михал Бицко, єден із основателів Музею модерного уменя Енді Варгола в Міджілабірцях, його сучасный куратор і емерітный презідент Общества Енді Варгола (Andy Warhol Society). Бицко быв окрім іншого і єдным із основателів Русиньской оброды, першой пореволучной русиньской орґанізації у втогдышній Чехословакії. Михал Бицко ся тым зарадить міджі такых людей як Роні Вуд із ґрупы Rolling Stones, ці фотоґрафку Ані Лайбовітз, кідьже і они вже были лавреатами того оцініня.

TREBBIA заснована Смолаком

Міджінародне оцініня TREBBIA было засноване так само Русином – Міром Смолаком, котрый походить із днесь вже неіснуючого села Старина, в окресі Снина. Смолак абсолвовав філозофію на Універзіті Коменьского в Братіславі, пак штудовав на Гумболтовій універзіті в Берліні. Так само закінчів філмову режію на Філмовій і телевізній факулті Академії музичных умень в Празі. За соціалізма робив у Чехословацькім културнім центрі в Берліні, де пізніше засновав Ґалерію MIRO. В році 1994 єй переніс до Прагы, до Костела св. Роха. В році 2001 была на основі досліджінь The Gallup Organization Ґалерія MIRO выголошена за найоблюбленішу комерчну ґалерію в Празі. Выставльовав там такых умелців як Пікасо, Далі, Варгол ітд.

TREBBIA є оцініня, котре выникло як раз в празькім Костелі св. Роха, де має Міро Смолак свою ґалерію. Выникла в році 2000 як прояв почливости бізнісменам, меценатам і умлецям. Назва є подля рікы Требія і оцініня передавать Фундачный фонд TREBBIA.

Посланьом фонду є підпора актівностей правницькых і фізічных особ в народнім і міджінароднім розсягу на полю културы і уменя, підпора выставницькых проєктів умелецького заміряня, окрема підпора гуманітарных актівностей і підпора гуманітарных актівностей через іншы субєкты, удільованя творчіх штіпендій на основі схваліня справной рады Фундачного фонду TREBBIA ітд.

Михал Бицко

Др. Михал Бицко, ПгД. є вытварным теоретіком, музейоедуколоґом, куратором, емерітным презідентом Andy Warhol Society, но головно співосновательом першого на світі і доднесь єдиного европского Музею модерного уменя Енді Варгола в Міджілабірцях. О Варгола зачав інтересовати ся іщі перед револуційов у 1989-ім році. Першу выставку присвячену Варголови зробив перед револуційов на Основній умелецькій школі в Міджілабірцях.

Вєдно із братом Енді Варгола – Джоном Варголом, і Фредом Гюджесом, втогдышнім презіднетом Фундації Енді Варгола про візуалне уменя в Ню Йорку, засновав музей в Меджілабірцях в році 1991, што ся в културно-умелецькім середовиску на Словакії доднесь бере за найвызначнішу умелецьку дію світового значіня. Дякуючі тому факту за 26 років до Міджілаборець пришли стовкы тісяч навщивників, много вызначных людей, о музею і місті Міджілабірці было зробленых дакілько філмів, місто дістало своє місце в турістічных книгах ці брожурах і завдякы загранічным выставкам під кураторскым веджіньом Михала Бицка ся місто Міджілабірці, но і ціла Словакія позітівно репрезентовали за граніцями.

Бицко реалізовав десяткы міджінародных выставных проєктів за участи презіднетів, політіків, штатників – мож спомянути міста як Флоренція, Рим, Даблін, Корк, Франкфурт над Моганом ітд.

В році 2004 засновав єдине одділіня музейоедуколоґії на Словакії і сотворив сілабы про акредітацію навчалного предмету музейоедуколоґія на высокых школах в Пряшові, Баньскій Быстріці і Братіславі. Є автором десяток професійных і науковых статей о уменю і умелецькій едукації, котры вышли в многых домашніх і загранічных збірниках, так само є автором 5-ох моноґрафій і едітором шестьох збірників і десяток каталоґів ку выставкам.

Михал Бицко є і основательом Експеріменталного центра умелецькой выховы в Міджілабірцях, котрый є вызначным центром умелецькой едукації на Словакії в рамках музейницькой і ґалерійной едукації.

Має міджінародный цертіфікат єксперта на сучасне уменя і тітул F.A.B.I. америцького біоґрафічного інштітуту. Минулый рік му была передана Ціна міста Міджілабірці.

Передаваня в юні

Оцініня TREBBIA ся будуть святочно передавати 18-го юна 2017-го року од 20.00 год. у Іспаньскім салі Празького замку. Ґалавечур із передаваня того оцініня буде під покровительством презідента Чеськой републікы Мілоша Земана, міністра културы Чеськой републікы Даніела Германа і Владиміра Длоугого – презідента Господарьской коморы Чеськой републікы. Чеська телевізія і Словацька телевізія будуть із той події высылати прямый ефір.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА