Традічны ремесла, природа і русиньскый темперамент. Обявте Полонины вже третій раз

Унікатный зажытковый вікенд в русиньскых Полонинах на Словакії вже став літньов традіційов. Почас третього авґустового вікенду 2022-го року на навщівників Народного парку Полонины чекають облюблены ремеселны зажыткы.

Выроба керамікы, тканя, робота з деревом ці прутьом, но і печіня хліба. То лем часть того, што оголошають орґанізаторы 3-го рочника події з назвов Обявте Полонины. Любителі природы будуть годны навщівити карпатьскы пралісы, а то нелем почас дня, але і в ночі, припадно позоровати міліоны звізд в Парку темного неба

Актівности у вісем селах

Тогорічна подія Обявте Полонины одбуде ся в днях 19-го аж 21-го авґуста і проходити буде в трьох полониньскых долипнах.

„У тім році будуть актівности розділены до вісем сел окресу Снина – Стащін, Ладомирів, Пчолине, Тополя, Русина, Влыч (Уліч), Кривый (Уліч Кривый) і Новоселіця,“ інформовала орґанізаторка Ева Коцанова з обчаньского здружіня Таке наше.

Блудиско в коноплі і трактор

Ку пятьдесятьом унікатным зажыткам про діти і дорослых прибудуть знова і новоты. Наприклад конопля – єден з новых зажытків, принесе до увагы навщівників тоту інтересну рослину, котра має шыроке выужытя. Якраз конопля даколи традічно належала ку Полонинам.

„Хоць на ню дакус призабило ся, може веце людей бы іщі нашло на повалі старе полотно з коноплі або лену, припадно облечіня. На фармі в Пчолинім навщівници дізнають ся о плеканю, обробліню коноплі, діти докінця будуть годны стратити ся в блудиску з коноплі, або ся повозити на тракторі,“ описує проґрам Коцанова.

У хыжці Дідка Вечернічка в Новоселіці будуть діти годны зажыти русиньскы співанкы і танці, но і інтересны ручны роботы повязаны із звірятами. Русиньскы крої, співы, музика, вышывкы, но передовшыткым русиньска натура і гумор будуть творити унікатну атмосферу покоя і співналежности.

Чісло навщівників росне

„Нашы зажыткы переведуть навщівників дакілько селами повязаныма з традічныма ремеслами, русиньскым темпераментном і недотуленов природов. Надвяжеме на попередні рочникы, котры принсели множество забавы, людьскых стріч і позітівной енерґії,“ доповника Катарина Романова, співорґанізаторка події.

Зажытковый вікенд выникнув на підпору необявленого реґіону Полонин у 2020-ім році. Кількость навщівників за рік двократно наросла. Інтересный проґрам влони пришло спробовати понад 800 людей із вшыткых частей Словакії, а были і навщівници зо заграніча.

Навщівници оцінюють покій, родинну атмосферу, прекрасну природу, можливость спробовати собі ремесла, а облюблены суть і романтічны ночны зажыткы при позорованю звізд.

Полонины ся вам дістануть під скору

Подія Обявте Полонины є файнов принагодов спознати тот про многых іщі все необявленый куточок Словакії.

І орґанізаторка Ева Коцанова, котра є з Кошыць, лем перед пару роками Полонины обявила. Не крыє надхенаня з того реґіону. Подля Коцановой почас події можете дістати Полонины, їх пахоту, смак, фарбы і гумор під скору. І то вшытко в прекрасній природі, із щірыма людми, автентічно і по русиньскы.

Подія уж на вакаційній мапі

Літню вікенду подію орґанізує обчаньске здружіня Таке наше, котре было основане на підпору турістічного руху і реґіоналного розвитку на выходній Словакії.

Подля Коцановой повнить свій замір. „Подія Обявте Полонины собі нашла своє місце на вакаційній мапі Словакії. Їй унікатность є у створіню інтімного споїня меджі навщівниками і містныма жытелями. Не іде лем о ремеселны варштаты. Участны мають достаточный простор побісідовати, ділити ся о свої радости жывота ці скушености. Збогачують ся взаємно, і то є тото найкрасше, што людей тігать на Обявте Полонины.“

Тот рік проєкт підпорили партнеты, котры актівно беруть на події участь. Меджі нима є Народный парк Полонины, Словацькый союз астрономів і Словацьке астрономічне общество при Словацькій академії наук, Фундація Словацького ґазового промыслу, Пряшівскый самосправный край, Радіо і телевізія Словакії а Областна орґанізація турістічного руху Вышній Земплін.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА