Тогорічна матуристка з лемківского языка – Анна Шмайда, в проґрамі “Pytanie na śniadanie”!

Тогорічна матуристка з лемківского языка – Анна Шмайда, в середу, 22. липця т.р. буде гостьом проґраму “Pytanie na śniadanie”, котрий є емітуваний в загальнопольскым проґрамі TVP2.

Як дознали сме ся од Анны, єй выступліня буде емітуване ок. 9.45 год. Не єст то певна інформация, бо, так в радию, як і в телевізиі, в звязку з передачом нажыво, вельо може ся змінити. Зато рекомендуєме, сядте перед телевізор од самого рана в середу і ждийте на выступліня лемківской матуристкы, першого дівчате, котре одважыло ся здавати матуральний іспыт з лемківского языка (скорше было лем 3 хлопчысків).

Бесіда буде, очывидні, тыкала ся матуры з лемківского языка, а може і лемківской достоменности, походжыня і культуры.

Кєд лем мате змогу в тот ден влучыти телевізор, сердечні заохочаме до обзераня!