Тікет

Знам єден жыдівскый фіґель. Старый Моше, бідный Жыд, ходить в Єрусалимі каждый тыждень молити ся ку Муру рыданя і все просить Господа, жебы му дав выграти Lotto. Так то му є 30 років, аж то Пана Бога омерзить і раз на нього з Небес скрикне: А коли уж подаш тікет, ты дураку?!

Ніт, тото не буде лекція з реліґії о тім, же Бог всемогучій, ани ексурз до юдаізма. Скоріше бы єм хотів підкреслити, же без тікета не мож выграти.

Перед часом Карпато-русиньске конзорціюм Северной Америкы зробило петіцію, котрым хотіло апеловати на україньскы власти, жебы вытворили условії про русиньске школство на Україні і підпорьовали його розвиток. Подія той сорты то од конзорція не была перша, но скінчіла гірше, як тота перша сперед двох років.

З тым, жебы підписати петіцію, конзорціюм ословило лідрів русиньскых орґанізацій в окремых европскых державах, в котрых жыють Русины, котры окрім піпдисаня мали інформації о петіції загнати і членам своїх орґанізацій, з просьбов, жебы так само петіцію підписали. Кідь возмеме, же лем така Русиньска оброда на Словеньску має мати коло 800 ці 900 членів, і то не рахую далшы орґанізації на Словакії, але і в далшых державах, назбераных 468 підписів є ганьба на три зимы.

О петіції інформовав портал lem.fm, котрый завісів статю на свій фанпейдж на сіті Facebook, пошырьовав статю на різны русиньскы ґрупы. Возьму собі до мерку лем дві. Carpatho-Rusyns Everywhere! має через 4 тісячі членів. Rusnáci na fejsbuku. Koľko nás v skutočnosti je? має через 26 тісяч членів. Денно суть на тых ґрупах завішены тісячі людей, додавають там міліон баласту і вытішують ся з того, якы суть горды Русины. При кількости через 30 тісяч людей, котры мали можливость видіти статю о тім, же ся розбігла петіція, котра хоче напомочі Русинам на Україні, якы доднесь не мають свої права, є чісло 468 підписів під петіційов нелем ганьбов, але і барз смутным дзеркалом нашого „гордого русинства“. Статя была навеце публікована і в ґазеті Інфо Русин, котрый ся посылать на веце як 500 адрес, інформовав о тім і Рутенпрес. Резултат ня дость міцьно шокує, в злім смыслі.

То, же самы підкарпатьскы Русины барз слабо підпорили тоту петіцію, же містны русиньскы орґанізації знають зробити шумный фестівал, но не ословлять людей, жебы підписати петіцію, котров хотять америцькы Русины помочі їм самым, то вже є про мене діло, котре уж сягать аж  до сфер таємніць віры, котры людьскому розуму не мож зрозуміти.

Не чакав єм чудо. Не чекав єм десяткы тісячів підписів, но покля образок грибів на єдній ґрупі а хрестный лист прадіда з Олькы на ґрупі другій докаже здобыти стовкы „лайків“, потім є 468 підписів під петіційов, котра хоче войовати за нашы права мементом, коли ся треба задумати над тым, о чім тото наше Русинство іщі властно є.

Петіція скінчіла. Lotto не мож выграти без того, жебы чоловік подав тікет. Ани молити ся ку Богу не поможе, бо як бы лем Господь не хотів, жебы сьте досправды выграли, без поданого тікету то не є можливе і вы ся можете молити кілько лем хочете. Петіція была тікет. Вы сьте го не подали. Нажаль, потім не мож чекати ани то, же будеме выгравати.

(Статя была написана як коментарь „Вступне до контроли“ лемківского радіа lem.fm.)

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА