Терочка зас концертує в Краковi

Мож повісти, што тото місто полюбило ґорлицкій бурсяний ансамбль. Перед місяцьом, 3. січня/януара, Терочка колядувала на краківскым головным Рынку в рамках перегляду колядничых ґруп і новым выступліньом зачала тогорічний концертовий сезон. А уж в найблизшу неділю, 5. лютого/фебруара, буде мож зас Терочку почути, тым разом в «Літерацкій Кавярни» на краківскым Казімєжу. Ансамбль запрезентує іщы покус святочний репертуар, лем публика буде могла слухати і традицийны лемківскы співанкы. В ден концерту, охочы будут мочы придбати свіжо выдану платню ансамблю і то в промоцийній ціні. Вступ на концерт є дармовий, прото каждий любитель лемківской музыкы годен прити і потішыти ся рідныма звуками в теплым і культурным місци.

Ґрупа Терочка діє при Стоваришыню Руска Бурса в Ґорлицях. Основана была в 2008 роцi Андрийом i Галином Малецкыма. Потім з ансамбльом робили Сусана Яра і Славко Трохановскiй. Од 2014 р. ведіня Терочкы перевзял Андрий Трохановскiй і надале єй успішно розвиват. Ґрупа дає штораз то більше концертів, а головні прикрашат подіі, якы проходят в Рускiй Бурсi. В репертуарі, окрем народных, має і авторскы русиньскы співанкы.

Літерацка Кавярня то місце, в котрым систематично сут орґанізуваны стрічы з творцями, якы репрезентуют вшелеякы просторы артизму, кумшту і знаня. Місце тото є споіньом кавярні, книгарні, але предовшыткым находит ся там саля з естрадом, перезначена до концертуваня і орґанізуваня стріч з інтересуючыма людми. Кафе находит ся в самым центрі «жыдівского» кварталу – Казімєж в Кракові, ул. Краківска 41.

Концерт Терочкы зачне ся о 18.00 год. Ту мотузок до подіі.