Теодор Кузак і «Угрорускій Нацийональный Театр» в Унґварі – проґрам «Говорить Пряшів» – пятниця, 18.10 год.

Радийо Русин.фм з Братиславы як каждый тыжден приносит порцийку вісти о плянуваных культурных подіях і роботі русиньскых інституций – Музею Русиньской Культуры, Театру Александра Духновича, ансамблів ПУЛьС і Рутенія.

Целебритом того тыжня буде родак з Чертіжного при Лабірци, учытель, громадскій діяч і писменник – Василь Зозуляк. Вродил ся Василь Зозуляк 19. вересня/септембра 1909 р. Вчыл ся в Мукачівскій Учытельскій Семінариі . Протягом ІІ світовой войны был і членом партизанткы. В 1944 р. робил в совітскій адміністрациі на Підкарпатскій Руси, яка беззаконно зачала окупацию той териториі. По 1947 р. Василь Зозуляк рішыл переселити ся до Чехословациі. Ту влучыл ся активні до насильной украінізациі Русинів. Зачал роботу секретаря товдышньой Народной Рады Украінців Пряшівшыны, потім остал директором украіньского одділіня словацкого літературного выдавництва. Брал активну участ при основаню украіньского музею во Свиднику. Але споминаме на нього головні за його писменничу творчіст. Як вельох інчых русиньскых писменників, своі першы творы писал по росийскы. Дебютувал збірками «Одноактные пьесы» і «Пьесы» і оповіданями «В кровавом тумане». Од половины 50-тых р. писал выключні по украіньскы оповіданя, повісти, сатиричны тексты і драмы, найчастійше тыкаючы ся жывота Русинів на Пряшівщыні. Вмер Василь Зозуляк 15. мая 1994 р., в Леховицях на Моравскым.

Петро Медвід в Перличках прочытат пару короткых вісти, котры были надрукуваны в підкарпатскій ґазеті «Карпатска Неділя» в місяци груден/децембер 1940 р. Буде про турне Угроруского Нацийонального Театру в Унґварі, котре ґазета гейбы славит лем же не до кінця, бо пише, што успіх представліня был бы о много більшый, кєд бы театр выставил дакотру пєсу домашнього автора – Русина з Підкарпатя. Буде і про Мадярскє Театральне Товариство ім. Рудольфа Енке, котре зачало сезон в Ужгороді од одпрезентуваня оперетты. В Мараморош Сиґоті поставлят новый уряд до справ реґуляциі потоків і рік на Підкарпатю. На конец про успішный миколаівскій вечер в Ужгороді.

В Припоминці Теодозія Латтова буде роздумувала про концерт родака з Габуры, співака з ґрупы ПУЛьС – Марка Мохнача, котрый прошол в театрі Александра Духновича. До театру пришла і купета люди з Габуры, цілый автобус. Буде і про нещестя того світа, хоц і тото буде може веце на весело.