ТАД, ПУЛС, Штець: Пару тіпів на културный авґуст

Хоць іщі все боюєме з пандемійов і многы културы події суть зрушены, або ся роблять в обмедженім режімі, предці лем мож і теперь найти принагоду, жебы ся културно обогатити.

Приносиме вам пару тіпів на місяць авґуст, котры вам ґарантують якостный културный зажыток. На сцену вернув Театер Александра Духновіча, Пуддукляньскый умелецькый людовый субор і Штефан Штець.

ТАД

Театер Александра Духновіча мусив в марці неочековано перервати театралну сезону 2019/2020. О што скоріше зо сцены акторы одышли, о то скоріше ся на ню вернули. Зачатком авґуста одкрыли вже нову театралну сезону і першый місяць схоснують на выступліня по нашых селах. А де мож в авґусті театер видіти?

15-го авґуста ся нашы акторы представлять в селі Дрієніця (даколи Шома), де одограють успішну комедію з назвов О двох ґенералох, в котрій ся представлять облюблены Йосиф Ткач, Василь Русиняк і Євґеній Либезнюк.

22-го авґуста у Вышній Ядльовій і 23-го авґуста в Полаті наш професіоналный театер одограть пєсу під назвов Зістали за дураків. Комедія Марка Кропивницького была театром наперед наштудована в україньскім оріґіналі, теперь ся зачінать грати в русиньскім перекладі. Богатый млинарь Кукса і його сусід коваль Дранко суть безнадійны в гляданю богатого мужа про своє велике потомство, но не знають, же жены ся о себе знають постарати самы і поміч од отців їм нияк не треба. Зістали за дураків ґаранутє файну театралну забаву.

25-го авґуста на наш театер мож іти до Габуры. Там ся нашы акторы представлять із пєсов Фараоны. Комедія приносить гуморну і выдарену моделову сітуацію на тему перевернутя сполоченьскых роль, кедь єдного красного дня прийде до колхозу вість, же там, де стояли дотеперь жены, будуть хлопи, і наопак.

Кропивницького Зістали за дураків театер іщі одограть кінцьом місяця, 29-го авґуста в селі Торискы і о день пізніше, 30-го авґуста у Збої.

ПУЛС

Наш Піддукляньскый умелецькый людовый субор по примушеній перерві в сезоні вже мав выступліня в місяці юл. В авґусті маєте можливость видіти ПУЛС двараз. 8-го авґуста о 15.00 в Ольці, і 9-го авґуста о тій самій годині в Кружльові. В обидвох селах представить ся ансамбель з проґрамом Навернутя.

Проґрам Навернутя є твореный із найгранішых і у публікы найуспішнішых композіцій вызначных словацькых і загранічых творців почас цілой історії того тілеса. Покля хочете о ПУЛС-і дізнати ся што найвеце, треба іти якраз на тот проґрам.

Концерты Штефана Штеця

Якбач найпопуларнішый на Словакії інтерпрет русиньской народной співанкы молодшой ґенерації – Штефан Штець, выдав кінцьом 2019-го року свій другый албум під назвов Вітор дує. На ярь были рихтованы концерты, но і співакови перервала планы пандемія.

Штець выужывать можливость грати в літі на амфітеатрах, і так го люди будуть годны відити в рамках штирьох концертів.

Выступати буде 14-го авґуста на амфітеатрі в Камюнці, 16-го авґуста на амфітеатрі в Меджілабірцях, 21-го авґуста на амфітеатрі в Гельпі і 23-го авґуста на амфітеатрі у Свіднику.

Покля хочете знати веце інформацій о подіях, котры сьме вам принесли в нашім выбері, найдете їх на офіціалных сайтах і фанпейджах на сіті Facebook.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА