ТАД одпремєрує пєсу Пінязі

В пятніцю 11-го октобра 2024-го року в Театрі Александра Духновіча в Пряшові одбуде ся перша премєра новой театралной сезоны. Русиньскый театер одпремєрує пєсу Дода Ґомбара під назвов Пінязі. Режії хопила ся гостююча режісерка Алена Вісел Лелкова.

Рішіня дати тоту пєсу до репертоара Театру Александра Духновіча (ТАД) пояснив драматурґ інсценації Мірон Пукан тым, же то намага выкрыти „біле місце“, кедьже ТАД уж довше не грав сучасну словацьку драму. „Очекуєме, же свойов актуалностьов ословить вшыткы верствы публікы. Через гуморны уровни рішыть повсякденны сітуації. Авторів гумор є ласкавый і болістный,“ цітує Пукана аґентура TASR.

Режісерка, котра перед тым робила в ТАД режію в році 2014 повіла, же автор тексту єй ословлює тым, як зображує меджілюдьскы односины сучасників, што їй є близке.

„Пєса є повна выключно актуалных проблем односин на різных ґенерачных уровнях. Кедьже собі усвідомлюю, же ТАД не належыть ку фінанчно богатым театрам, та мусили сьме роздумовати, што вшытко собі можеме дозволити із сценов. Навеце, театер є заяздовый, значіть і тото мы решпектовали,“ сконштатовала Лелкова.

Директор театру Маріян Марко в тій пєсі видить добру принагоду, жебы ословити публіку в шыршім реґіоні, де ТАД із своїма інсценаціями ходить. Так само повів, же при каждій єдній інсенації, котру театер робить, є тугов драматічного колектіву і то, жебы были запрошены на даякый фестівал.

В новій пєсі на сцені буде мож видіти Мартіна Оравца, Зузану Ковалчікову в алтернації з Міріямов Федорковов, Євґенія Либезнюка, Володиміра Рогача, Йосифа Пантликаша, Йосифа Ткача і Василя Русиняка.

Музику до інсценації скомпоновав Мартін Гусовскый, і переклад на русиньскый язык робила Анна Кузмякова.