Святочне засіданя Спільной Комісиі Уряду та Нацийональных і Етнічных Меншын

З нагоды 10. річниці покликаня Спільной Комісиі Уряду та Нацийональных і Етнічных Меншын, 22. вересня (септембра) одбуде ся єй торжественне 52. засіданя, в котрым участ возмут актуальны і бывшы члены СКУтНіЕМ. Стріча зачне ся о 13.30 год., а тым разом, з нагоды річниці, буде проходила в будинках Канцеляриі Презеса Рады Міністрів в Варшаві.

Тото свято єст нагодом до одзначыня і нагороджыня осіб, котры діют на хосен меншын, а іх діяльніст могучо влият на охорону і розвиток культуровой достоменности меншын. Єдным з нагородженых буде Ярослав Трохановскій – «Маестро», котрий з рук представників Президента Польской Республикы – Анджея Дуды, одбере Золотий Крест Заслугы (чытайте в статі за тым мотузком).

В проґрамі 52. святочного засіданя Спільной Комісиі Уряду та Нацийональных і Етнічных Меншын находит ся іщы пресова конференция і выступліня представників меншын.

Спільна Комісия Уряду та Нацийональных і Етнічных Меншын была покликана в 2005 р. (перше засіданя – 21. вересня (септембра) 2005 р.) як наслідтсво записів «Уставы про нацийональны і етнічны меншыны та про реґіональний язык» з 6. січня (януара) 2005 р. Єй першыма репрезентантами з лемківской етнічной меншыны были др габ. Олена Дуць-Файфер (выбрана лемківскыма орґанізациями) і Штефан Гладик (преставник украіньской меншыны, призначений міністром без поясніня причыны покликаня такым же трибом – при протестах лемківскых орґанізаций).

Разом з основаньом ґрантового систему фінансуваня проєктів, котры мают на ціли охорону і розвиток лемківской достоменнтости, основало ся, або зактывізувало до діяня, вельо новых орґанізаций, охочых партиципувати не лем в побераню дотаций, але і в выбераню репрезентанів Лемків в СКУтНіЕМ, што конец-кінцьом довело до завязаня в 2013 р. таємной коаліциі 9 орґанізаций (ачий до днес некотры з них молчат на тоту тему), котра прібувала одликати єдину де факто репрезентантку лемківской етнічной меншыны в Комісиі – др габ. Олену Дуць-Файфер. В результаті заскакуючого рішыня, премєр ПР Дональд Туск одкликал Штефана Гладика, за котрого, як члена СКУтНіЕМ, 1. червця 2014 р. остал покликаний др габ. Штефан Дудра, професор Зеленогірского Університету. Остатні рішыня, тыкаючы ся составу лемківскых членів Спільной Комісиі, прошли 1. вересня (септембра) 2014 р., коли на внесок орґанізаций з таємной коаліциі др габ. Олена Дуць-Файфер остала одкликана. Єй місце, рішыньом премєра ПР, заняла др Мирослава Копыстяньска.

Радийо ЛЕМ.ФМ, котре слідит за вшыткыма важныма для охороны і розвитку достоменности лемківской етнічной меншыны новинами, влони, по персональных змінах составу представників Лемків в Спільній Комісиі Уряду та Нацийональных і Етнічных Меншын, мало нагоду бесідувати нажыво з теперішніма єй членами в своім ефірі – 19. червця (юна) 2014 р. з проф. Штефаном Дудром і 1. жолтня (октобра) 2014 р. з др Мирославом Копыстяньском. Обоі, як єдну з першых задач, плянували шырокій контакт з лемківскыма орґанізациями, але обіцяли тіж, же не будут оминяти нашу медияльну ґрупу, зато о іх вражыня і успіхы в діяльности Комісиі будеме хотіти звідати неодолга.