Свято Меду і Вина в Пшемкові – подія з лемківскыма акцентами

На вікенд 29.-30. вересня/септембра 2018 р. в Пшемкові на Нижнім Шлеску пройде ХІХ Свято Меду і Вина. Не буде то єдина імпреза в місті в ноным часі. В тых днях орґанізуваны будут і ХХХVI Загальнопольскы Дни Пчоляря. Традицийом пшемківской імпрезы сут од років выступы лемківскых выконавців.

Істо лемківскым дньом буде субота. В містецкым парку од год. 16.30 буде мож позерати на выступ Сестер Бочнєвич, артисток, якы не лем грают народну музыку, але і самы компонуют новы аранжациі до авторскых творів. Дві сестры, маючы завершену высшу музычну освіту, будут прикрашати пшемківскє свято в лемківскым стилю.

Неодолга по концерті Рамоны і Наталиі Бочнєвич, на сцені запрезентуют ся такой ґаздове. То Лемківскій Ансамбль Пісні і Танця «Ластівочка», діючий в місті. Колектив, якій перед роками оснований был при пшемківскым Кружку СЛ, днес є амбасадором не лем лемківской культуры, але тіж самого Пшемкова і околиц. Ґрупу буде мож обзерати о год. 17.30.

Традицийом Свята Меду і Вина є правліня екуменічных богослужынь. Што рік недільны Службы Божы сут правлены наперемінно в єдных з трьох конфесийных храмів. Того рока святочна літургія правлена буде в православній церкви св. Михала Архангела. Будут там присутны тіж грекокатолицкій і римокатолицкій священникы з парохій в Пшемкові. Молитва пройде з участю душпастырів пчолярскых орґанізаций та почестных гостів свята.

По службі вшыткы підут в хороводі до парку, де пройдут послідні концерты. В рамках того о год. 17.45 буде мож слухати гіп-гоповой ґрупы Секция, яку творит єден з братів давного колективу Братсклад, Андрий Дзямба. Секция выспівує і лемківску лірику.

Більше чытайте на залученым афішы.