Світовий Ден Радия

З ініциятывы іспаньского радия од 2012 рока, 13. лютий то Світовий Ден Радия. Встановліньом того дня, як свята вшыткых высылань, Орґанізация Зъєднаных Наций хотіла дати доказ вагы радия, як середка комунікациі медже людми і його надзвычайну ролю для технолоґічного і соспільного розвитку.

З той нагоды радийо Руской Бурсы ЛЕМ.фм – перше лемківскє радийо, желат вшыткым слухачам доброго ефіру!

Редакторы нашого радия днес ділят ся зо слухачами рефлексийом над тым, чым єст для них  робота в радию?

Наталія:

Завдякы ЛЕМ.фм надію ся, же іщы кус часу мине, закля Лемків і лемківскій язык впишеме до Реґістру Забытків… А робота в радию? Но, што-ж, так по правді, николи єм ся не споділа, же так мном жытя покєрує, же приде мі робити акуратні тото, што роблю, зато з каждым дньом, місяцьом, йой, мож уж речы, же роком, сут то для ня новы досвідчыня, вельо новых емоций, контакт з людми, а і присутніст там, де не все думала бы-м быти, але тіж – несподиване для ня – превеликє задоволіня, же не єст то робота по даремници і комуси тото ся придає і приносит хосен.
Пробачте, слухачы, чытачы, моі недотягніня, хыбы, а часом може і планну якіст, але де бы-м даколи подумала, же будеме мати своє радийо і треба буде журналістів? Чловек вчыт ся ціле жытя, же так мало блискотливі закінчу.

ґ:

Радийо, по мойому, то не лем переказ вісти. Радийо то школа лемківского языка, істориі і літературы. Радийо то модернізуваня, переламаня монополів, демаскуваня пропаґанды, завлащуваня і выоначуваня змісту і подобы лемківского языка і культуры. Радийо мат гварити голосно тото, што роками радит ся по тихы.

Лем.фм то презентация загальнолемківского, котрий я розумію як русиньского, погляду на вшелеякы справы. 

Для мене Лем.фм то чыстий голос.

Павльо:

Радийо то нова лемківска якіст!

Демко:

Ани не знам, што речы. Зачынал єм як причыплений до радийового ансамблю, што раз на тыжден зробит проґрам, а тепер мушу тым цілым проєктом шефувати. Але оне “мушу” то предовшыткым “хочу”, хоц “хочу” то фурт “мушу”. Як з перстеником Гоббіта. А коли оба тоты часослова ся стрічают посередині, то вшытко мі грат. І най грат. Будут наступны люде в радию, а оно фурт буде грало!

Сусанна:

Сотворіня Лем.фм то подія світового масштабу для вшыткых Лемків, для котрых важний є розвиток лемківской культуры і соспільного комунікуваня ся. Лем.фм є для вшыткых “небайдужых”.

Традиция і фолькльор є важний, лем іщы важнійшым є творіня нового.

Настка:

В радию єм од самого початку. Уважам то за великє выріжніня. Завдякы радию вельо навчыла єм ся о собі і людях. Радийо ма вчыти, бавити, смішыти, давати під задуму, задавати звіданя і давати одповіди, а часом давати лем реторычны звіданя. Є то тяжка і одповідальна робота, але тіж велика радіст. Річом, яком найчастійше ділила єм ся з Вами слухачами то моі емоциі – щыры. Кус легше одкрывати себе коли є ся кус анонімовым і ма ся анонімовых слухачів-чытачів. Зато, власні, была єм все правдива і хыбаль тото є найціннійше – тота натуральніст, през котру выражам свою пошану для радия і його слухачів. Хочуу выкликувати в Вас усміх, коли пєте поранну каву, коли робите порядкы, коли одпочывате, хочу вытиснути часом сылзу, а часом лишыти Вас з поплянатаныма думками. Дякую, же сте, бо хоц не знам, де і хто ня слухат в окрисленым моменті, то є він для мене, каждий з Вас в тій хвили найважнійший, єдиний і вынятковий. Завдякы роботі в радию моя експресийна душа находит своє місце. А Вы, надію ся, находите місце для себе в нашым лем.фм.