Світова Рада Русинів выбрана!

Од четверга, 29. червця/юнія 2017 р., в хорватскым Осієку проходит XIV Світовий Конґрес Русинів і VIII Світовий Форум Русиньской Молодежы. По одчытаню вшыткых справописів, выступлінях делеґатів і гости, головным пунктом третього дня засідань являли ся выборы новой Світовой Рады Русинів, котра буде координувала роботу СКР за два наступны рокы.

Новістю на тогорічным СКР была процедура выборів шефа СРР. Дотепер выберали го спосеред себе члены Світовой Рады Русинів, але за новопринятым статутом выберают го вшыткы присутны делеґаты. Так і, по зголошыню делеґациями поєдных держав своіх представників до СРР, в выборах кандидували Микола Бобинец (Украіна), др Штефан Лявинец (Мадяры, дотеперішній шеф СРР) і Джон Ріґетті (ЗША). Така выборча процедура выкликала дальшы новости – кандидаты мусіли представити свій выборчий проґрам і переконати до себе векшыну делеґатів.

В промові каждого з трьох кандидатів являли ся важны для русиньской спільноты справы – так в локальным, як і інтерреґіональным просторі, зато і выбір не был простий. В першым турі голосуваня найбільше голосів отримал Микола Бобинец, другій был др Штефан Лявинец, але результаты выборів вырішыли ся в другій турі, котру выграл другій з выміненых, остаючы новым шефом Світовой Рады Русинів на дальшы два рокы.

Желаючы новій Раді успіхів в своій діяльности, представляме полний єй склад:

• Штефан Лявинец (Мадяры) – шеф СРР
• Микола Бобинец (Украіна)
• Мартін Караш (Словация)
• Андрий Копча (Польща)
• Дюра Папуґа (Сербія)
• Джон Ріґетті (ЗША і Канада)
• Ґеорґій Фірцак (Румунія)
• Янко Чопік (Чешска Республика)
• Мійо Шайтош (Хорвация)
• Светлана Мурешан – од Світового Форуму Русиньской Молодежы