«Світ під Кычером» на Лемковині і Пряшівскій Руси!

XVIII Медженародовий фольклорний фестіваль «Світ під Кычером», в тым році, як і в попередніх, приде зас на територию Карпатской Руси!

27. червця т.р. буде проходил перший концертовий ден в Креници на Лемковині, де заграничны гості і Лемкы зложат квітя під памятником Никыфора. Пак буде мала місце парада на креницкым дептаку, котра буде лем вступом перед ґальовым концертом, котрий в Креници обдуде ся третього дня фестівалю. В тым самым дни одбудут ся тіж концерты в другых лемківскых селах, т.є Ґладышові, Устю Рускым і Брунарах.

Другій ден фестівалю, 28.червця т.р. буде мал уж місце на Пряшівскій Руси, понеже народны і ентічны артистычны ґрупы завитают до русиньского села Курів. Сес концерт буде під назвом І світ пришол до Курова.

Третій ден то поворот на Лемковину і зас выступы в лемківскым місточку Крениця. Хоц в перший ден мали місце анімациі на креницкым дептаку, то на тот раз, 29.червця т.р. буде мал місце ґальовий концерт, завершаючий І част фестівалю «Світ під Кычером».

ІІ-а част буде проходила на чужыні, то значыт на Нижнім Шлеску. О тій подіі неодолга будеме інформувати на нашым портали.

Веце інформаций на залученым долов афішы.