Свидницка сцена на богато

Понедільок, 23. мая 2016 р. – то початкова дата найбільшого фестівалю Русинів Словациі, ІV Русиньского Фестівалю, котрий проходит цілий тыжден, аж до неділі 29. мая. По стрічах з представниками Музею Русиньской Культуры в Пряшові, театральных пєсах, презентациі Інституту Русиньского Языка і Культуры ПУ і дискусийным панели, орґанізуваным Здружыньом Інтеліґенциі Русинів Словациі, в пятницю, як кульмінацийний пункт тогорічной подіі, фестіваль перенесе ся до свидницкого амфітеатру.

Од пятниці, 27. мая, місцевий амфітеатр выполнит ся не лем публиком, але і богатым чыслом выконавців, котры прикрашат тогорічне свято. Сценічний проґрам зачне ся од 18.00 год. выступами школярів основных шкіл, котры в фольклорным виді запрезентуют русиньску культуру. Дале останеме в народно-фольклорній части, і на сцені запрезентує ся Дітячий Фольклорний Ансамбль Команичка. Пак, на закінчыня того бльоку, сцену прикрасит іщы Танцувальний Клюб Мариі Сопковой.

20.00 год. то такой зачаток вечерніх выступів модерных солістів та ґруп. Насамперед на сцену свидницкого амфітеатру выйде добрі знана цілій Словациі Крістіна, котра як раз народила ся во Свиднику. Співачка в 2010 році репрезентувала Словацку Республику на 55. Конкурсі Евровізиі, што пак дало ій славу поповой співачкы не лем на домашнім музычным рынку, але і за границями Словациі. Крістіна одвиділа Русиньскій Фестіваль уж влони, але, на жаль, не заспівала ани єдной співанкы в русиньскым языку.

Завершыньом пятниці буде выступ од 21.30 год. ансамблю Rusín Čendeš Orchestra. То модерна русиньска ґрупа, котра хоснує головні такы музычны жанры як етно, фольк та world music. В своім репертуарі мают народны русиньскы співанкы, котры переаранжували і переспівали на свій ориґінальний спосіб. На ансамбль складат ся 6 осіб, котры, окрем чудового співу, грают на цимбалах, гушлях, басах, ґітарі та перкусиі. Навязуваня до народной русиньской музыкы, котра є мила для уха, то єдно; при звыках ґрупы мож сміло і погуляти.

Другій ден музычных выступів во свидницкым амфітеатрі зачне ся о 15.00 год., коли гостів привитат Дітячий Фольклорний Ансамбль Вінок. По них, на сцену выйде барз добрі знана Русинам в Польщы, наша Терочка – молодіжний ансамбль Руской Бурсы з Ґорлиц. Ансамбль, як раз, нагрыват тепер свою першу студийну платню, зато мож ся сподівати, же і во Свиднику будут запрезентуваны творы, котры пак будеме мати змогу чути уж на выданым альбомі. Выступ Терочкы то добра нагода на стрічу і примір культуральной выміны Русинів з Пряшівщыны і Лемковины. Выступліня потвердит своєрідну нероздільніст єдного народу, котрий не знат державных границ.

По выступі ансамблю з Лемковины, приде час на Фольклорний Ансамбль Вігорлят та Дітячий Фольклорний Ансамбль Маковичка, котрий наштоден фунґує при більшій Маковици. По них на сцену свидницкого амфітеатру войде Фольклорний Ансамбль Рутенія з Братиславы. То молодіжна ґрупа, котра є офіцияльным репрезентацийным ансамбльом орґанізациі Молоды.Русины. Рутенія была основана кінцьом 2010 р., вчас 6. Русиньской забавы в Братиславі (того рока успішні концертувала в Полудньовій Америці). В дальшій части суботніх выступів буде мож взріти два добрі знаны русиньскы ансамблі: Фольклорний Ансамбль Маковиця та Піддукляньскій Умелецкій Народний Ансамбль (PUL’S), котрий кінцьом 2015 рока празднувал 60. річницю свого основаня. ПУНА до днес являт ся єдиным професийональным русиньскым ансамбльом во світі, діючым як інституция культуры

По фольклорній части, котра скінчыт ся близко 20.30 год., на сцені вкаже ся Ігор Куцер враз з Emotion Group. Куцер презентує ся з переспіваныма і зааранжуваныма ним народныма русиньскыма піснями, котры колиси співала мама Едні Варголя – Юлия. То ориґінальне получыня оперового співу зо стильом world music, з котрым Ігор Куцер обдыл уж неєдно турне (в тым недавне в ЗША). Посліднім концертом суботнього вечера буде выступ музыка родом з Гуменного, Марияна Чековского, зо свойом ґрупом, котра выспіват русиньскій репертуар.

Неділя, 29. мая, то уж послідній ден свидницкого Русиньского Фестівалю 2016. Зачне ся він пополудньом од 14.00 год. выступами ґрупы Выходнярскы Шарканиці, а по них придут на сцену жены з ансамблю Свидничанка. Потім запрезентуют ся співачкы з Росы та ґрупа Волянка. До Свидника приде тіж ґрупа з Камюнкы – ведена актуальным шефом Русиньской Оброды, Мартіном Карашом, ансамбль Барвінок. По концерті камюнчан во Свиднику другій раз буде мож видіти Маковичку і старшу Маковицю. 

Завершыньом ІV Русиньского Фестівалю в Свиднику буде ґальовий концерт знаных Кандрачовців, котры мали змогу одвидіти Свидник в попередніх едициях фестівалю. Ансамбль был оснований Андрийом Кандрачом в 2004 році і од самого початку явил ся як народна музычна капеля. Кандрачовці то штырьох вызначных гудаків, котры окрем словацкого репертуару, выконуют і русиньскы пісні. Во Сиднку напевно запрезентуют ся з істо русиньскым проґрамом.

Детальну розписку проґраму ІV Русиньского Фестівалю во Свиднку, котрий проходит в днях 23. – 29. мая т.р., найдете на офіцияльным сайті подіі під адресом: www.rusinskyfestival.sk. Попри тым слідте панрусиньскій тыжденник ЛЕМ.фм+ та інформацийний порталь радия лем.фм, де будеме приности свіжы інформациі, тыкаючы проходячого свята Русинів Словациі.

фот. ансамбль Барвінок на Русиньскым Фестівали во Свиднку; джерело: фейбуковий фанпейдж подіі