Свідник із Стропковом проти зрушіня суду. Боять ся декаденції реґіону

Апелачным писмом звернула ся пріматорка Свідника Марцела Іванчова і пріматор Стропкова Ондрей Брендза до міністеркы справеливости Марії Коликовой. Пріматоры міст на выході Словакії не суть согласны з пропозіційов реформы судной мапы.

Подля спомянутой пропозіції бы Окресный суд у Свіднику мав стати деташованым робочім місцьом Окресного суду у Воронові над Топльов. Іванчова і Брендза таку ідею беруть за непродуману і неправилну. Інформовала о тім аґентура TASR.

Рушіня урядів має болістный ефект на місто

Як пише аґентура, пріматоры підтримують намагы міністеркы, жебы юстіція мала векшу кваліту, выкон, жебы мала векшу довіру у людей, но на другім боці похыбують о правилности рішіня односно свідницького суду, котрый має на старости і Стропківскый окрес.

„Трансформація Окресного суду у Свіднику на деташоване робоче місце суду у Воронові над Топльов не бере до увагы історічны ани природны звязкы в реґіоні. Сьме окресами без желізнічной штрекы і без покрытя теріторії якостным громадным транспортом. Доступность сел, головно зо северных частей теріторії реґіону, не є в пожадованім часовім ліміті, о котрім пишете у вами презентованім матеріалі,“ апелують пріматоры в писмі до міністеркы.

Як далше пишуть, поступный одход вызначных урядів і інштітуцій з міста Свідник, што было одарґументоване высшым цільом реформ і давало собі то за ціль економічну выгодность або розвиток реґіонів, мав про місто Свідник і його жытелів болістный ефект.

„Спомянеме наприклад Уряд роботы у Свіднику, з котрого є лем деташоване робоче місце, і наперек факту, же безробітность в окресі належыть меджі найвысшы на Словакії, або зрушіня породніці. Маєме обавы, же зрушіня Окресного суду у Свіднику одштартує далшу серію реформ (прокуратура, поліція), котры окресне місто, як і цілый реґіон посунуть до декаденції, з котрой не буде пути назад,“ підкреслює в писмі Іванчова і Брендза.

Жадають міністерку о стрічу

Реформа в подобі знижіня чісла окресных судів із 54 на 30 судных округів общых судів є подля Іванчовой важным засягом.

„Словакія не є гомоґенна країна з розвитов сітьов транспорту і якостным покрытьом публічным транспортом, з єднаков густотов населіня і єднакым приступом к інфраштруктурі, зато треба решпектоватл вшыткы тоты реґіоналны розділы,“ доповнила Марцела Іванчова з тым, же міністерку жадають о стрічу, де бы могли передложыти свої арґументы.

„Пожадала єм о скликаня засіданя реґіоналного Здружіня міст і сел Словакії. Меджітым проходить і підпорна акція вшыткых старостів сел в окресі Свідник і Стропків. Стрітила єм ся із председом Окресного суду у Свіднику, в тій темі потребуєме знати фаховы арґументы. Ініціовала єм стрічу на уровни пріматорів Свідника і Стропкова і предностів обидвох окресных урядів – Михала Ільканина і Петра Гаврана. Ініціовала єм стрічу з представителями владных коалічных партій в окресі і пожадала їх, жебы пожадавкы реґіону были тлумачены на владну уровень,“ додала Іванчова.

Фото: Яна Отріова.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА