Св. Франтишок в штуці і думці Юрия Новосільского – звиджаня з провідником

5. вересня т.р. буде мож одбыти особливу вандрівку. Особливу – раз, же в особливым місци, два – в особливым товаристві, а три – вандрівка буде тыкала ся особливой темы.

Вандрівка буде одбывала ся в єдным з краківскых костелів, якій найдеме на побережах того міста. В костелі, якій в одріжніню до тых вознесеных в центрі міста, не одзначат ся за барз од окружаючых го мешкальных бльоків. Така была колишня політыка власти з часів Польской Народньой Республикы, жебы новобудуваны храмы не были высшы як забудова довкола. Є то костел Непорочного Зачатя Пресвятой Богородиці при ул. Хелмоньского 41 в Кракові, якій єст костелом монастыря о. Франтишканів Реформатів.

Аспектом, выріжняючым костел, єст тото, што можеме найти в середині. Находит ся там розпис Крестного Ходу авторства Юрия Новосільского. Три остатні пристанкы находят ся на великым, простокутным панно (декоратывна част), поміщеным за престолом. Находят ся на ним тіж образы звязаны зо св. Франтишком, покровительом монастыря.

Про творчіст Юрия Новосільского на примірі розпису того костела буде оповідала Кристина Черні – історичка штукы, критычка, выдатна знавчыня творчости та жытя Юрия Новосільского, авторка вельох книжок і дописів про артисту.

Початок нуковой вандрівкы год. 16.00, місце зобраня – при вході до костела.

(фот. П. Каспшыцка mik.krakow.pl)