Сумар дня на 9. жолтня/октобра 2020 р.

Приносиме вам сумар медияльной ґрупы ЛЕМ.фм+ на ден 9. жолтня/октобра 2020 р.

Масочкы в каждым публичным просторі – ціла Польща в жолтій зоні

Од заране жолта зона буде обовязувала в цілій Польщы, поінформувал на вчерашній пресконференциі премєр Матеуш Моравєцкій. Од 10. жолтня/октобра в каждым публичным просторі буде обовязок закрывати ґамбу і ніс. Наказ є введеный з огляду на значуче збільшыня ся чысла заражынь коронавірусом в Польщы посліднім часом. Вчера денне чысло хворых перешло 4 тис. Премєр оцінил, што ліпше ввести ограничыня на обшыри цілой державы, як примірово заперати рух в поєдных воєвідствах і вводити ограничыня в свободі переміщаня ся. Од суботы в червеній зоні, з найповажнійшыма ограничынями найде ся 38 повітів. Премєр додал, што в тій хвили неє конечности ізолювати цілу державу так, як то было на яр.

Ремонтуют дорогу Перегримка-Новый Змигород

Зачал ся ремонт дорогы на одтинку Перегримка-Новый Змигород. Модернізация фраґменту воєвідской дорогы но 993 на тым одтинку буде коштувала більше як 9,5 млн зл. В рамках інвестициі, котра уж ся зачала, выремонтуют тіж м.ін. придорожну обшыр, зъізды, скрижуваня, тротуары і обшыри автобусовых затриманок. Інвестиция є спілфінансуваня з Проґраму Трансграничной Спілпрацы Польща-Словация 2014-2020. В проєкті по словацкій страні змодернізуют одинок дорогы медже місцевостями Фіяш-Ломне (Fijaš – Lomné). Одтинок дорогы Перегримка-Новый Змигород є частю воєвідской дорогы но 993 Ґорлиці-Новый Змигород-Дукля. Інвестиция є продолжыньом модернізациі той дорогы на одтинку Ґорлиці-Новый Змигород започаткуваной минулого рока.

І тот рік Драматичный Мемориял Петра Різнича Дяді

Театральный фестіваль, Драматичный Мемориял Петра Різнича Дяді, котрый шторік орґанізуют войводиньскы Русины в Рускым Керестурі, пройде і того рока. Його 52. едиция заплянувана на період од 15. до 18. жолтня/октобра. А 59. Фестіваль Руской Культуры «Червена Ружа» одбуде ся 31. жолтня/октобра. В рамках театрального фестівалю будут презентувати вчас відеопроєкций скорше вытворены спектаклі, а то «Кінґ-конґ», «Зборне місто» і «Нацийональна стратеґія». Остатнього дня буде премєрово вказана монодрама «Сон смішного чловека» Достоєвского в режысериі Владиміра Надя Ачыма, в головній роли Мирослав Малацек. В рамках Фестівалю «Червена Ружа» одбуде ся концерт, на котрым запрезентуют ся выключні артисты з Руского Керестура, а то Велика Народна Оркєстра Дому Культуры з солистами та молоды керестурскы музикы в репертуарі з забавныма співанками з попередніх едиций. Концерт буде так само трансмітуваный онляйн.

Осінній редик з Чорного до Нового Торгу

В середу, 7. жолтня/октобра, бача Юзеф Клімовскій з югасами з Нового Торгу рушыли з Чорного, в ґміні Санкова, з редиком домів. Стадо овец, якє чыслит 1200 штук, прогнали Радоцином, Конечном, границьом державы до Реґєтова, а пак Высовом до села Ріпкы. В четвер рушули через Баницю, Мохначку до Рытра і дале до Коростенка і Нового Торгу. В Чорным пасли уці през піл рока. Осінній редик был 34. в жытю бачы Юзефа Клімовского. Протягом літа до колибы приходили туристы з цілой Польщы. Могли призерати ся роботі пастырів, а тіж придбати плясканку сыра. Tраса редику є од років тота сама. По приході ґуралів домів, до Нового Торгу, все є свято. При музиці переганяют уці містом і вертают до своіх ґаздівок. Зимом будут одпочывати і рыхтувати ся до весняного повороту з уцями на колибу до Чорного.