Сумар дня на 8. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 8. вересня/септембра 2021 р.

Бесідувати будут і про буджет на меншыны

Днес од рана проходит LXXIV засіданя Спільной Комісиі Уряду та Нацийональных і Етнічных Меншын. В проґрамі засіданя сут м.ін. вручыня покликань для новых членів Комісиі та справы повязаны з тырваючым фурт Нацийональным Повселюдным Списуваньом. Буде тіж дискусия на тему высокости ґрантів в буджеті державы на 2022 р. на задачы повязаны з розвитком нацийональных і етнічных меншын і іх шторічном діяльністю. В тій части голос має забрати представник Міністерства Внутрішніх Справ і Адміністрациі. Од становиска МВСіА найпевнійше буде залежала дальша дискусия. Вчас стрічы будут бесідувати і о участи меншын в Крайовым Пляні Одбудовы. Представникы міністра будут пак презентувати інформацию на тему прац над VIII рапортом тыкаючым ситуациі нацийональных і етнічных меншын та реґіонального языка в Польскій Республиці.

Стріча Східніх Католицкых Єпископів Европы

Од 5. до 12. вересня/септембра в Будапешті проходит Медженародный Евхаристичный Конґрес. При тій нагоді од 4. до 8. вересня/септембра проходит гын і стріча Східніх Католицкых Єпископів Европы. Темом тогорічной стрічы є Евхаристия і синодальніст. Окрем представників окремых церкви в стрічы участ бере і Його Блаженніст Юссеф Абсі, мелькітскій грекокатолицкій патріарха Антіохіі і цілого Сходу, Єрусалима і Александриі, як і кардинал Анґельо Баняско, котрый є председом Рады Европейскых Єпископскых Конференций. Завершыньом цілой стрічы буде одслужыня торжественной літургіі 8. вересня/септембра, в ден праздника Рождества Пресвятой Богородиці, за новым календарьом, в Базилиці святого Штефана. Реґулярны шторічны стрічы єпископів східніх католицкых церкви Европы орґанізуют ся од 2005 р.

Сусіды стрічают ся в приграничы

В тых днях студенты з Німец, Польщы, Словациі і Украіны подорожуют в приграничных обшырях, де познают істориі голокавсту, ентнічных чысток ци насильного переселяня по ІІ світовій войні. В рамках 6. едициі проєкту In Between? під назвом Neighbours meet in the borderlands (Сусіды стрічают ся в приграничы) студенты бeсідуют з людми, котры памятают іщы вымінены подіі, а ефектом будут популярно-науковы подкасты, якы будут поясняти особливости пригранича в середньосхідній Европі. Студийна подорож по польско-словацкым пограничы має служыти познаню істориі Русинів і Жыдів. Плян обнимат візиты в Бардийові, Свиднику, Осадным, Меджелабірцях, Бічы і в Лоси.

Дальшы ремонты дорогы но 993

Од понеділька, 6. вересня/септембра, до 25. того місяця, з огляду на ремонт, закрыли черговый одтинок дорогы номер 993 Ґорлиці-Новый Змигород-Дукля. Тым разом запертый є 10-кілометровый фраґмент од скрижуваня в Фолюшы до скрижуваня з воєвідском дорогом номер 992 в Новым Змигороді. Зрыхтуваны сут обізды. Дорога має быти постепенно удоступняна для жытелів та властителів земель. Модернізация воєвідской дорогы но 993 Перегримка-Новый Змигород є продолжыньом робіт започаткуваных минулого рока, м.ін. через побудуваня новых мостів в Клопітници і Перегримці.

Фот. за фб-профіль Меншыновой Страны СКУТНіЕМ