Сумар дня на 9. січня/януара 2024 р.

Приносиме вам сумар медияльной ґрупы ЛЕМ.фм+ на ден 9. січня/януара 2024 р.

В Розстайным будуют реплікы бывшой церкви

В Розстайным зачали будову мініятуровой реплікы бывшой церкви свв. Космы і Даміана. Памяткова капличка стане в тым самым місци, де перед роками стояла ориґінальна святыня. Ініциятором поставліня реплікы єст Михал Хомик, родом з Святковы Малой, тепер прожываючый в Америці. Хоче він в тот спосіб заховати для потомных памят про жытелів села Розстайне. Проєкт реализуваный єст Обєднаньом Лемків в Ґорлицях. Обєкт буде высокій на близко 8 метрів, а основа буде мала 3,5 на 3,5 метра. Церков з  1791 рока згоріла в 1914 році. В тым же місци жытелі Ростайного в 1921 році побудували нову святыню, котра по 30 роках была розобрана. На церквиску лишыли ся лем камінный цокіл з памятника і камінна хрестительниця. Ділянка, на котрій побудуют капличку, находит ся на обшыри Маґурского Парку і згідні з правом належыт до Скарбу Державы, котрого репрезентантом в терені єст староста. В рамках реализациі проєкту ділянку може хоснувати Обєданя Лемків.

В Польковицях просят на консультациі в справі пішо-роверовой дорогы при ул. Оцьосовій

Бургомайстер Польковиц Лукаш Пузнєцкій просит до участи в соспільній консультациі в справі концепциі пішо-роверовой дорогы при ул. Оцьосовій. В часі стрічы власти запрезентуют пропозициі, як мож докінчыти роботы при проєкті получыня осіля Ґварків з роверовыма стежками в його околици. Як підкрислил бургомайстер міста, властям залежыт на тым, жебы новы інвестициі были не лем безпечны і комфортовы, але тіж жебы одповідали на потребы жытелів та брали до увагы іх пропозициі. Консультациі пройдут заран, 10. січня/януара о 17.00 год. в основній школі но. 3. В стрічы участ возмут тіж представникы протиогньовой стражы і поліциі з секциі дорогового руху.

Власти ґорлицкого повіту припоминают о принципах охороны в звязку з выпадками вказаня ся волків при селах

Власти ґорлицкого повіту апелюют до жытелів Білянкы тримати особливу безпеку і достримувати принципів особистой охороны в звязку з зголошеныма выпадками вказаня ся волків при селі. Припоминают, што волкы то дикы звірята і в більшости уникают контакту з людми, єднак часом можут ся призерати з даякой одлеглости. При стрічы з волком треба помалы одыйти, а кєд волк підыйде на одлегліст меншу як 30 метрів – треба поінформувати Ґмінный Уряд в Ґорлицях. То може свідчыти о неправильных захованях звіряте. Особливо важне єст запезпечыти одпады і не лишати ниякого ідла перед хыжом, бо може то притягнути звіря. Треба тіж памятати о домашніх звірятах,  котры можут быти легком цілю атаку.

Рекордовый рік в Креници

Бургомайстер Крениці на своім фейсбуковым сайті передал, што в місті пал рекорд вплывів з курортной оплаты – понад 8 млн зл. Додатково ґміна Крениця може ся похвалити новым рекордом проданых нічлігів – понад 1,5 млн. Як підкрислил бургомайстер, Крениця з року на рік пошырят свою оферту, притігат новых туристів і єст розпознавальным туристичным продуктом.

Лем до кінця тыжня мож обзерати выставу пн. «Юлия» присвячену ювілейови артистичной творчости Юлиі Дошны

Припоминаме, што іщы лем до 14. січня/януара в Музею Дворы Карвациянів і Ґладышів в Ґорлицях мож обзерати выставу пн. «Юлия» присвячену ювілейови 40. років артистичной творчости Юлиі Дошны. Презентувана выстава вказує подорож артисткы через цілу єй артистичну діяльніст, од 80. років ХХ ст. коли співала в ансамблю Лемковина, через ріжного рода спілпрацы з джазовыма ци клясичныма музиками, аж до актуальных проєктів. Презентуваны фотоґрафіі, плякаты і памяткы вказуют ріжны аспекты єй карєры і вклад в спадковину лемківской культуры. Над выставом почестный патронат тримат Староста Ґорлицкого Повіту, Мария Ґубала.