Сумар дня на 9. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 9. серпня/авґуста 2024 р.

В Маластові бесідувано о дальшій трансграничній спілпрацы Польща – Словация

В середу 7. серпня/авґуста в Маґурскій Господі в Маластові прошла медженародна стріча, в котрій взяли участ делеґациі – з Міністерства Інвестиций, Реґіонального Розвитку і Інформатизациі Словацкой Республикы під ведіном міністра Ріхарда Раші. В склад делеґациі зо словацкой страны вошли іщы Михал Калиняк, секретар стану, Адрияна Червеньова, ґенеральна директор секциі вводжыня Проґраму Словация, Мартін Гудзік, ґенеральный директор европейской територияльной спілпрацы, Юрай Гоштак, ґенеральный директор секциі проґамуваня і спертя Проґраму Словация. З польской страны брали участ м.ін. Ян Шышко, секретар стану в Міністерстві Фундушів і Реґіональной Політикы, Малґожата Малух, війт Ґміны Санкова, ци ведучы такых орґанізаций як Европейскє Уґрупуваня Територияльной Спілпрацы TATRY z o.o., Стоваришыня Карпатскій Еврореґіон, Малопольска Туристична Орґанізация і Звязок Ґмін Доріча Вислокы. Зорґанізувана Ґміном Санкова і Нижньом Полянком конференция тыкала звекшыня ефективности реализациі спільных трансграничных проєктів польскыма і словацкыма самоурядами. Підчас стрічы были омовлены м.ін. адміністрацийне і фінансове фунґуваня самоурядів в Польщы, спілпраца ґмін поза уставово окрисленыма компетенциями та значыня проґраму Interreg Польща-Словация. Як подала ґміна Санкова, стріча закінчыла ся успішном дискусийом, котра послужыт дальшій трансграничній спілпрацы.

Шлезак выбраный віцеведучым комісиі в Европарляменті

В віторок 23. липця/юлия прошло інавґурацийне засіданя підкомісиі прав чловека (DROI) в Европарляменті. Шлезак Лукаш Когут з Громадяньской Коаліциі был выбраный віцеведучым той комісиі. Европосол Когут ствердил, же тота комісия є важна з польской перспективы, бо позвалят бороти ся о люди, котры для свободы, рівности і демокрациі готовы сут на найвекшы посвячыня. Як задеклярувал европосол Когут, в першій черзі займе ся справом Андея Пачобута, безправні вязненого режімом Лукашенкы. Европарляментариста, котрый сам є Шлезаком і од років боре ся о узнаня свойой меншыны, заповідат же «ślonsko godka» мусит быти реґіональным языком. В теперішній каденциі Европейского Парляменту єст в трьох комісиях: прав чловека, заграничных справ та культуры і едукациі, в котрій робил уж через пят послідніх років. Як подал, певністю на форум той послідньой буде бесідувал о тзв. шлезскій справі, бо тота комісия занимат ся тіж справами етнічных меншын. Як раз на форум той комісиі европосол заберал уж голос о шлезскых проблемах в просторі Европейского Парляменту. Веце чытайте в дописі на нашым портали.

Кєрмеш в грекокатолицкій парохіі Ґорлицях

В суботу 3. серпня/авґуста грекокатолицка Парохія Преображыня Господнього в Ґорлицях святкувала свій праздник – Ювілей 40-літя та свято Преображыня. З той нагоды Божеску Літургію очелил архієпископ Євген Попович, Митрополита Перемышльско-Варшавскій. В торжестві чысленно взяли участ парохіяне, як і запрошены гості. Місто Ґорлиці репрезентувал бургомайстер Рафал Кукля. Присутны были і священникы, котры перше служыли в тій парохіі, представникы Сестер Базилиянок, римокатолицкых спільнот та Ведучый Рады Повіту Кшыштоф Заґурскій. По Літургіі одбыло ся посвячыня овоців і святочны артистичны выступы.