Сумар дня на 9. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 9. серпня/авґуста 2021 р.

«Волкы» з Команчы хотят выкупити колекцию вышыванок і зорґанізувати Ізбу Памяток, потрібуют ішы 70 тис. зл

Стоваришыня Підпоры Локальных Ініциятив Команчы «Волк» просит о поміч, потрібує 70 тис. зл, жебы выкупити колекцию Дариі Боівкы і зорґанізувати Ізбу Памяток. Стоваришыня од понад 20 років підтримує розвиток ґміны Команча. Актуальна його ціль то затримати колекцию предметів, котру роками зберала разом з мужом жытелька ґміны Дария Боівка. Бесіда гев о ручні гафтуваным облечыню з ріжных сел в ґміні, пацюрковій біжутериі ци давным ґратю. Збірка рахує понад 50 елементів і окремо велику кількіст сучасных гафтів. Дария Боівка не лем колекцийонувала, але тіж одкрыла приватну Ізбу Памяток, завдякы чому вказувала свою збірку і припоминала о материяльній культурі Лемків. На жаль, по єй смерти неє охочых, жебы дальше вести Ізбу. Стоваришыня не хоче, жебы так цінна збірка пропала, зато цілю єст затримати цілу колекцию в ґміні. Зорґанізувано колекту грошів на сайті zrzutka.pl, на котру мож вплачати даткы. На вплачаючых ждут нагороды. Мотузок до колекты находит ся на офіцияльным фейсбуковым сайті Стоваришыня.

«Бескід без кіту»- театральна премєра уж 14. серпня/авґуста

Іщы лем тыжден рыхтувань лишыл ся до премєры спектаклю молодіжньой театральной ґрупы з Устя Руского. 14. серпня/авґуста артисты запрезентуют ся в спектаклю, котрый возник на основі книжкы «Бескід без кіту». В проєкт заанґажувало ся вельо осіб з околиц Устя і не лем. Театральном опікунком ґрупы і авторком сценария єст Моніка Бабуля, о музичну оправу задбал Мирослав Боґонь, а вокально рыхтує ґрупу Юлия Дошна, котру так само буде можна видіти на сцені. В проєкт заанґажувала ся тіж сама авторка книжкы – Мария Стшелецка. Як підкрислила Марлена Мозьдзіньска, координаторка цілого проєкту, акция єст орґанізувана завдякы підпорі війта ґміны Устя Рускє, Збіґнєва Людвіна, але тіж завдякы тым, котры підтримали інтернетову колекту, яка дале тырват. Ґрупі бракує уж невельо, жебы зреализувати вшытко, што было заплянуване. Мотузок до колекты найдете на нашым сайті.

https://pomagam.pl/747gf3

Знаме, хто выграл конкурс CarpathiaEtnoDesign 

Сут уж результаты конкурсу CarpathiaEtnoDesign орґанізуваного Стоваришыньом Карпатскій Еврореґіон Польща. Задачом учасників было запроєктувати ориґінальный взір навязуючый до взірничых традиций польско-словацкого погранича і жытелів давных Карпат. Спосеред многых прац конкурсова комісия рішыла нагородити пят. Перше місце занял Лукаш Жонца і то його взір пн. «Спільнота» буде схоснуваный до створіня «карпатскых шкатулок». Нагороджены роботы будут презентуваны на фіналовій ґали, але можна іх тіж видіти на фейсбуковым сайті стоваришыня.

Спільне обзераня падаючых звізд в Карпатах

Ініциятива Дикы Карпаты просит на спільне обзераня падаючых звізд в Карпатах, а докладні в місци, де находит ся табір ініциятивы. Подія пройде од 10. до 16. серпня/авґуста, а як пишут орґанізаторы, найліпше звізды мож буде видіти 12. серпня/авґуста. Цілю акциі єст підпора старань про створіня Турніцкого Нацийонального Парку.