Сумар дня на 9. мая 2023 р.

Приносиме вам сумар медияльной ґрупы ЛЕМ.фм+ на ден 9. мая 2023 р.

Карпатскій Народный Університет просит до участи в культуровых курсах

Карпатскій Народный Унверситет одкрыл записы в трьох курсах: фотоґрафічным, карпатской керамікы і загального карпатского проєкту, де в часі занять участнику будут мочы взяти участ в штырьох модулах: карпатска кераміка, карпатска кухня, пацюркова біжутерия та різбліня в дереві. Каждый з курсів веденый єст в формі вікендовых стріч, єдной або двох в місяци, зачынаючы од червця/юнія до максимальні жолтня/октобра. В часі варштатів учасникы будут мочы присвоіти теоретичне знаня, а пак выкорыстати го в практиці. З тогорічной оферты кусрсів лем фотоґрафічный єст дармовый. Два дальшы курсы сут платны, але в іх ціні окрем самых варштатів єст тіж нічліг і ідло. Дрібниці та формуляр зголошыня находят ся на офіцийным сайті Фундациі Реґіональный Інститут. Чысло місц на курсах єст ограничене.

«Лемкы – познайме ся і спілпрацуйме»

В будинку Стоваришыня «Руска Бурса» в Ґорлицях мож видіти фотоґрафічну выставу вказуючу красу нашой Лемковины. Выстава єст частю соспільного проєкту «Лемкы – познайме ся і спілпрацуйме» реализуваного Мелянійом Пелехач і Павлом Феціцом, Лемками, студентами, котры влони отримали фінансову підпору з Помостового Стипендияльного Проґраму. Цілю проєкту єст промувати знаня на тему Лемків, але тіж шырити толеранцию і пошануваня для інчых культур. Выставу мож обзерати до кінця мая, а більше о проєкті можете прочытати на фейсбуковым сайті «Лемкы – познайме ся і спілпрацуйме».

Ґміна Мушына старат ся про новы туристичны атракциі

В остатнім часі інформували сме, што власти ґміны Мушына старают ся побудувати лыжну стацию в Щавнику, але серед будучых атракций нашло ся тіж дашто на літній період. Як передал бургомайстер Мушыны Ян Ґольба, місто хоче розбудувати єдну з найпопулярнійшых атракций курорту, яком сут Тематичны Загороды над Попрадом і Сенсорична Загорода на Сухій Горі. В плянях єст одкрыти загороды в грецкым, кытайскым і лозиновым стили. Бургомайстер Мушыны потвердил, што місто має зрыхтуваны вшыткы потрібны документы і тепер уж лем жде на одкрытя новых унійных фондів.

Фотоґрафічна выстава посвячена Лемковині

Містецка Бібліотека в Пабяницях та Клюб Подорожника ПТТК просят до участи в вернісажу выставы пн. «Лемковина» авторства Януша Смяловского. Головным мотивом выставы фотоґрафа з Пабяниц єст деревяне будівницво Лемковины, цервки і хыжы. В проґраміі подіі находит ся тіж артистична част, в часі якой рецитуваны будут вершы і співаны реґіональны і туристичны співанкы. Акция пройде в понедільок 15. мая о 18.00 год. в Містецкій Публичній Бібліотеці в Пабяницях.

Ювілейный концерт ансамблю Верховина

Уж в тоту суботу, 13. мая в варшавскым Клюбі Проґресия одбуде ся ювілейный концерт фолькового ансамблю Верховина, якій грат і співат неперестанно од 1991 р. Буде то специяльный концерт, якій має підсумувати тридцетлітню історию діяльности і творчости колективу. Вчас выступу запрезентуваны будут пісні з ріжных періодів діяльности Верховины, так вельоголосовы співы, як і інструментальны творы. На сцені окрем актуального складу вкажут ся і члены ансамблю, котры грали в ним протягом 30 років. Припомнийме, што Верховина то капеля, яка в своім репертуарі має і лемківскы пісні, была частым гостьом нашых лемківскых подій і ватр.