Сумар дня на 9. мая 2022 р.

Приносиме вам сумар медияльной ґрупы ЛЕМ.фм+ на ден 9. мая 2022 р.

Центральны упамятніня 75. річниці Акциі «Вісла» в Перемышли

Перед тыжньом, в неділю Антипасхы, 1. мая, в перемышльскій православній катедральній церкви Успінія Пресвятой Богородиці проходили центральны – єпархіяльны божественны торжества упамятнюючы 75. річнию Акциі «Вісла». Святу Літургію очелювал ординарий перемышльско-ґорлицкой єпархіі архієпископ Паісий в асисті перемышльского духовенства. В проповіди владыка Паісий припомнул, што першый транспорт в рамках выселіня вырушыл 28. квітня/апріля 1947 рока зо села Щавне. Подал што: (цитуваня) «десяткы тысячы вірных нашой Церкви, жытелів полудньового Підляша, Холмщыны, Підкарпатя і Лемковины выгнали з іх рідной землі». Владыка приказал памятати про історию, бо «без памяти о істориі николи не зрозумієме сучасности, не зрозумієме нашой Церкви і Народу». По закінчыню літургіі одслужыли пасхальну панахіду за жерсви Акциі «Вісла» і лаґру в Явожні. Згідні з рішыньом владыкы Паісия памят траґічной Акциі «Вісла» была вспоминана во вшыткых церквах перемышльско-ґорлицкой єпархіі в 2. і 3. ден Христовой Пасхы і буде вчас вшыткых парохіяльных праздників в 2022 році.

Має быти безпечні вчас выпочынку над водом

Заряд Малопольского Воєвідства презначыл 400 тис. зл на підпору водного ратівництва в реґіоні. Середкы мают забезпечыти ратівничу готовіст і звекшыти безпеку осіб будучых над водом. Отвертый конкурс оферт розвязали 5. мая. Завдякы рішыню Заряду Малопольского Воєвідства дотациі признали м.ін. Ґорлицкій Водній Охотничій Медичній Помочы з сідибом в Климківці. Высокіст признаного дофінансуваня то 40 тис. зл. Грошы мают по части забезпечыти ратівничы дижуры, закуп ґратя, підносити кваліфікациі ратівників. Сезон, в котрым ґмінне купалиско на резервуарі Климківка пильнуване єст ратівниками, то липец/юлий-серпен/авґуст. Боцман Водной Станиці в Климківці урядує в терміні од 15. червця/юнія до 15. вересня/септембра. Іщы до кінця мая тр. мож складати оферты до війта Ґміны Ропа на вымінены становиска: боцмана і двох ратівників.

«Русины» в Празі

Іщы лем до четверга, 12. мая тр., мож обзерати фотоґрафічну выставу Іваны Яшміньской пн. «Русины» в ґалериі Дому Нацийональных Меншын в Празі. Выстава є пробом затримати на фотоґрафіях образ русиньского населіня, якє прожыват в місци дітинства артисткы. Івана Яшміньска то родачка з Гуменного, наштоден жыє і творит в Празі. Фотоґрафіі з циклю «Русины» вказуют люди, якы сут розділены з родином, самітны, бесідуючы або молчачы, якы тяжко роблят каждого дня або прібуют лем дожыти до наступного сходу сонця. Яшміньска так само документує і Нацийональный Парк Полонины. Фотоґрафію студиювала на Шлезскым Університеті в Опаві. В 2011 р. остала лавреатком першой нагороды The Annual Photography Awards, престіжового фотоґрафічного конкурсу о світовым засягу, за роботы вказаны в катеґориі Емоциі, отримала так само Grand Prix Award. В 2014 р. признали Яшміньскій перше місце в рамках CheckCzech Photo Competition.

Лемко в Плоцку

Зас од пятниці 13. мая мож в Мазовєцкым Музею в Плоцку видіти выставу творчости вызначного Русина, Епіфана Дровняка. Вернісаж выставы під назвом «Никыфор. Маляр над малярями» пройде в рамках Ночы Музеів. В забытковых поміщынях Шпіхлиря, маґазину зерна, будучого Етноґрафічным Одділіньом Музею, што находит ся на вісляній шкарпі, мож буде видіти 130 робіт найславнійшого примітивісты. Выстава комплексово представлят доробок маляря і обнимат вшыткы темы, якы малювал: ляндшафт, містецку і фантастичну архітектуру, желізницьовы стациі, середины склепів і храмів, фіґуры святых. Творы походят головні з колекциі Етноґрафічного Музею во Варшаві, а 30 рисунків походит з вынятковой колекциі Альфонса Карного, выбраны ним особисто в самого Никыфора, тым ціннійшы, што рідко експонуваны.

Фот. за www.orthodox.pl