Сумар дня на 9. марця 2020 р.

Приносиме вам сумар медияльной ґрупы ЛЕМ.фм+ на ден 9. марця 2020 р.

Інструкциі про охорону пред коронавірусом Перемышльско-Варшавской Архієпархіі Грекокатолицкой Церкви в Польщы 

Перемышльско-Варшавска Архієпархія Грекокатолицкой Церкви в Польщы опубликувала офіцияльны інструкциі Митрополиты Перемышльско-Варшавского Архієпископа Євгена Поповича, про міры охороны пред коронавірусом. В інструкциі владыка просит вірных, жебы не цілували святых ікон, або інчых образів в храмі, лем поклонити ся ім прикладаючы голову. Отці сут прошены не давати вірным цілувати Євангелию вчас богослужынь. Вірны мают тіж не цілувати рук священників, просячы о благословіня. Вода, котру вірны пют в храмі, або котром сут крещены, має быти заперта. Вірны принимаючы Святе Причастя прошены сут уважати, жебы не діткнути лжыці устами. Вірны, котры ся старают о своє здоровля, мают право вчас небезпекы приняти духовне Причастя. Отці, якы сповідают в конфесийоналах, прошены сут закрыти крату фолийом, штобы не допустити до фізичного контакту зо сповідаючыма ся. Вірны, якы досвідчают хвороты (аж і легкой простуды) прошены сут не одвиджати святынь, специяльно в часі богослужынь, аж до часу выздоровліня. В такым припадку вірный може брати участ в богослужыню через социяльных сіти, або телевізию. Єрарха інформує, што нормы тоту будут обовязувати во вшыткых храмах архієпархіі, покля загорожыня епідемійом коронавіруса не буде єднозначні розвязане.

Приміркы девастуваны

Приміркы (Przymiarki), верх, якій находит ся медже Івоничом а Рымановом, сут девастуваны любителями екстремальной ізды. Сут то комплексы гірскых лук хороненой обшыри Натура 2000, обняты рільничо-середовисковым проґрамом. На верх з видоковым пунктом ведут барз популярны пути. Являют ся цілю прогульок вельох жытелів і туристів одвиджяючых Івонич та Рыманів. З горы видно Цергову, Долы Яслиско-Саноцкы, при добрій хвили – Татры. Беззаконным райдам помагают лагідна хвиля і мокра земля. Єдночасно гірскы лукы по такых райдах являют ся здеґрадуваныма. Бургомайстер Рыманова і властитель Примірок не хотят єднак заперати пути ведучых до видокового пункту. Самоурядовці з Івонича і Рыманова вышли з апелями о тото, жебы жытелі протиставляли ся девастациі пути та природы і каждый такій припадок зголошували поліциі або лісній стражы.

Одкрытый ден Кашебской Етнофілолоґіі

10. марця 2020 рока на Філолоґічным Выділі Ґданьского Університету буде проходил одкрытый ден Кашебской Етнофілолоґіі. На заінтересуваных чекают того дня языковы варштаты, прелекциі, стрічы з писателями та інчы атракциі. Кашебску Етнофілолоґію мож студиювати лем на Ґданьскым Університеті. Вчыня кашебского языка повязане єст зо культуролоґічныма предметами. Студенты берут участ в такых занятях як: вчыня о языку, чытаня, аналіз і писаня літерацкых творів, збогаченых о історию Кашебів, Поморя і Польщы. Припомнийме, што до недавна і мы мали можливіст студиювати лемківскій-русиньскій язык на польскым університеті. Росийска філолоґія з русиньско-лемківскым языком на Педаґоґічным Університеті в Кракові ведена была од 2001 р., завдякы великым стараням др габ. Олены Дуць-Файфер – дослідниці языка, літературы і культуры Лемків та лемківскій діячці. Єдину в Польщы Лемківску Філолоґію заперто на Педаґоґічным Університеті в 2017 році. Днес мож русиньскій язык студиювати в Пряшові на Словаціі та в Новым Саді в Сербіі. Інститут Русиньского Языка і Культуры Пряшівского Університету возник в рамках Інституту Народностных Студий і Чужых Языків, як Катедра Русиньского Языка і Культуры в 1998 році. Од 2008 рока єст окремом єдиницьом Пряшівского Університету. Мож гын выбрати бакалаврскій, маґістерскій або докторантскій проґрам студий. Русиньскій інститут в Пряшові є єдином інституцийом на Словациіі, де мож студиювати русиньскій язык і культуру на вшыткых трьох рівнях едукациі.

Получыня Мушына-Попрад скорше верне до розкладу

Наконец інформуєме, што вікендове желізницьове получыня з Мушыны до Попраду верне до розкладу скорше як плянувано. Так рішыли разом Словацкы Желізныці і Малопольскы Желізныці. Влони склад курсувал од 29. червця/юнія, зато в 2020 році поіхат в трасу уж 6. червця/юнія. Буде курсувал каждый вікенд аж до 6. вересня/септембра. Влони получыня схоснувало веце як 4.500 пасажерів. Были то в векшыні жытелі Польщы і Словациі, але тіж Чех, Мадяр, Хорвациі, Австриі, Франциі, Німец, ци Анґлиі.