Сумар дня на 9. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 9. лютого/фебруара 2021 р.

Гірска Одисея – од січня до жолтня прятаня 700 км пути

Зачала ся нова едиция прятаня природы орґанізувана банком Credit Agricole разом з еколоґом Домініком Добровольскым. В минулым році было прятаня Поморя, того рока акция буде проходила в горах. Гірска Одисея зачала ся 23. січня/януара в Выжніх Устриках. Тогорічна траса веде через Карпаты і Судеты, од Устрик до Свєрардова, а єй долгіст то коло 700 км. Єст поділена на 10 части, реализуваных в выбраный вікенд місяця. Цілю акциі єст звернути увагу на проблем смітя в горах і лісах та едукувати туристів в тій темі. В часі вандрівкы охочых прятаны будут пути, а перед, по і медже тым мож буде послухати вебінарів і прелекциі на тему еколоґіі. Додатковом атракцийом акциі єст пленерова выстава пн. «Гірска Одисея», котру мож буде обзерати м.ін. в Новым Санчы, Коросні ци Яслі. Наступный етап акциі проходил буде од 19.-21. лютого/фебруара з Команчы до Дуклі, а пак 28. і 29. марця з Дуклі до Кренциі. Акция закінчыт ся в першый вікенд жолтня/октобра.

Нагорода імени священника проф. Болеслава Кумора – дале можна слати зголошыня

Тырват IХ едиция конкурсу о Нагороду імени священника проф. Болеслава Кумора, яка орґанізувана єст Соспільно-Культурным Товариством «Сандеччан» при підпорі порталю і місячника «Сандеччан». Рішыньом капітулы Нагороды перенесено термін приниманя зголошынь. Як мож прочытати на сaйті місячника «Сандеччан», на тепер капітула не подала даты, до коли треба слати зголошыня. Вшытко зато, жебы дождати ся можливости стрічы авторів з чытачами. Припоминаме, же зголошыня приниманы сут в двох катеґориях: книжка о Сандеччыні та сандецкій автор. Цілю конкурсу єст пошырювати ріжного рода книжкы выданы в 2020 році, якы звязаны з Сандеччыном, та промувати і нагороджувати авторів родженых або прожываючых на обшыри Сандеччыны. На лавреатів обох катеґорий і выріжненого, котрый выграт в голосуваню чытачів, ждут фінансовы нагороды і памятковы статуі. Каждого рока серед номінуваных до нагороды выдавництв находят ся і тоты звязаны з лемківском темом.

Політик з Солідарной Польщы оповіл ся за усуніньом німецкоязычных назв желізницьовых стаций

Віцеміністер державных активів та посол на сойм Януш Ковальскій оповіл ся за усуніньом німецкоязычных назв желізницьовых стаций в Хжонстовицях і Дембскій Кузни. В тій ціли зложыл інтерпеляцию до міністра інфраструктуры Анджея Адамчыка. Подля політика з Солідарной Польщы хоснуваня німецкых назв місцевости попри польскых не єст згідне з правом, додатково «фактичный стан спричынят чысленны выразы незадоволіня жытелів і веде до дезорієнтациі подорожуючых». Віцеміністер вважат, же переписів тыкаючых ся права до двоязычных назв місцевости, в якых прожыват меншынове населіня, не можна хоснувати в примірі желізницьовой стациі. Ковальскій арґументує то м.ін. тым, же назва желізниці не єст така сама як назва місцевости. До внеску віцеміністра однюс ся ведучый Товариства Соспільно-Культурального Німців на Опольскым Шлеску та ведучый соймику опольского воєвідства Рафал Бартек. В своій выповіди підкрислят, же PKP уж в 2015 році реґулювало квестию ознакувань на обшыри замешканій меншынами в своіх принципах. В записі стоіт, же назв стаций/пристанків ся не тлумачыт на чужы языкы, з вынятком назв локализациі на обшырях замешканых уставово узнаныма нацийональныма і етнічныма меншынами або населіньом, што хоснує реґіональный язык.

Пути в Бєщадскым Нацийональным Парку закрыты

Вчера на офіцийным фейсбуковым сайті Бєщадского Нацийонального Парку явила ся інформация о закрытю туристичных пути. Власти підняли такє рішыня в консультациі з ратівниками з Бєщадской Ґрупы GOPR в звязку з тяжкыма условіями і тым, же шлякы вкрыты сут ледом. Покля што не подано, до коли обшыр Бєщадского Нацийонального Парку буда закрыта для вандруючых.