Сумар дня на 9. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 9. листопада/новембра 2023 р.

Дворічный проєкт Ельпіс в Ґорлицях

Як інформує Єпархіяльный Осередок Православной Культуры Ельпіс в Ґорлицях, в 2023 р. Осередок приступил до тырваючого два рокы едукацийного проєкту пн. «Лем бесіда нам остала». Завдякы дофінансуваню з Малопольского Воєвідства, Ельпіс в текучым і будучым році заоферує молодежы в шкільным віку можливіст ліпшого познаня лемківской культуры, языка і істориі. В текучым році Осередок зорґанізувал м.ін. ХVII едицию конкурсу рецитациі лемківской поезиі. Зорґанізуваны были тіж трансляторскы варштаты, якы вюл Петро Криницкій. В 2023 р. Ельпіс зорґанізувал 4 лекциі для учеників основных шкіл в Бодаках, Санковій, Ґладышові і Ґорлицях, вчас котрых представлено лемківску поезию і прозу. Вчас лекций лемківску творчіст і культуру презентували м.ін. Петро Трохановскій, Андрий Трохановскій і Оксана Грабан-Ліхтаньска. Цілю реализуваного проєкту є звернути увагу молодого поколіня на факт, што меншыновый язык з заложыня є загороженый загыблю, о кілько не буде ся в ним бесідувало.

Припомнут особу владыкы Гіркы

В найблизшу суботу, 11. листопада/новембра 2023 р., в Абрановцях на Словациі одбуде ся літургічне святкуваня, в рамках котрого грекокатолицкы вірны припомнут собі 100 років од народжыня владыкы Йоана Гіркы. В місцевым храмі Рождества Пресвятой Богородиці владыка Петро Руснак буде служыл архієрейску літургію, по котрій на фасаді церкви буде одкрыта і поблагословлена пропамятна таблиця з нагоды той же річниці. Торжество буде пак продолжало ся молитвами панахіды над гробом владыкы, котрый был першым пряшівскым грекокатолицкым єпархом по 1989 р., і є похованый як раз на теметові в Абрановцях. На сам конец перед сельскым урядом буде одкрыта бюста єпископа Йоана Гіркы.

Авария руропроводу в польковицкым повіті

Як інформує сайт polkowice.eu, в послідніх днях мала місце нічна авария руропроводу на осадовым штучным озері «Желізный Міст». Засолена технолоґічна вода вляла ся до загорід і хыж жытелів поблизкых сел. Бургомайстер Польковиц, Лукаш Пузьнєцкій, запевнил о спертю для постраждалых і звернул ся до властистеля зопсутой інсталяциі о збільшыня помочы. В наслідстві выливу декотры загороды были підтоплены, плоты перевернены, засолена штучні вода стоіх в лісах, а при тым на подвірях і луках находит ся ілове болото. Інсталяцийом, яка ся розышла в деякых місцях, была транспортувана солянка. Інстялация належыт до Гыдротехнічного Закладу KGHM. На місце были одраз посланы єдиниці пожарничой стражы. На місце поіхал тіж бургомайстер Польковиц, де в Домброві бесідувал з місцевым шолтысом, Осифом Спяком. Не была то перша того рода авария систему. В вересни/септембрі влонишнього рока проблем выступил в селі Жуків.

«Акт» Новосільского од днес в Ґданьску

Уж днес о 18.00 год. в Нацийональным Музею в Ґданьску одбуде ся вернісаж выставы «Докладні!». Як раз таку назву має цикль выстав, вчас котрых музей притігат увагу гости до єдного твору. Тым разом твором тым буде «Акт» з 1978 р. Юрия Новосілького. О 18.00 год. не лем зачне ся офіцийне одкрытя выставы, але тіж орґанізаторы проведут опроваджыня по образі, значыт приближат його розумліня і історию. Образ в ґданьскым Музею буде презентуваный до 3. марця 2024 р.