Сумар дня на 9. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 9. листопада/новембра 2021 р.

Стрічы Трьох Поколінь з Лемківском Культуром в Пшемкові

6. листопада/новембра одбыли ся в Пшемкові XIV Стрічы Трьох Поколінь з Лемківском Культуром. Подія, котру орґанізувал місцевый Кружок Стоваришыня Лемків, зачала ся о 16.00 год. Окрем ґаздів, значыт дітячого ансамблю Ластівчата і ЛАПіТ «Ластівочка», на подіі запрезентувала ся ґрупа з Лемковины – Терочка з Ґорлиц, і реактивуваный специяльні на тоту подію ансамбль ДаМир. Серед чысленной публикы XIV Стріч Трьох Поколінь з Лемківском Культуром были тіж запрошены гості, м.ін. сенаторка Дорота Чудовска і посланкыня Ева Шыманьска. Для тых, котры не могли быти, на фейсбуковым фанпейджы Стоваришыня Лемків находит ся відеозапис з подіі. Додатково, як подає сайт GłogówNaszeMiasto, явила думка, жебы о рік Стрічы зорґанізувати спільні з ґміном Радваниці. Товды імпреза тырвала буде два дни, єден ден в Пшемкові, а другій в Радваницях.

Серце Ґорлиц о рік буде барже зелене

На ґорлицкым рынку зачал ся першый етап прац, котрый має на ціли поправити імідж серця міста. Бесіда о саджыню деревок і кущів, котры на яр зроблят рынок барже зеленым. Актуальні, з причыны ревітализациі, рынок в більшости єст забетонуваный, што не лем злі выглядат, але тіж одстрашат мешканців і туристів в горячы дни. Част дерев засаджена єст в специяльных горцях, бо як підкрисляют власти міста – было то найліпше розвязаня, жебы не ушкодити новой верствы рынку і не наражати ся на дальшы кошты. В звязку з тым што якісый час дерева будут заступуваны новыма, а дотеперішні насаджыня поміщены будут на обшыри міста. Такє низко буджетове зазеленіня спричынит, же уж на яр на рынку легше буде скрыти ся перед сонцьом ся в тіни.

Бесіда з Данутом і Ваньом Дзюбинами з Лемківской Едукацийной Загороды

На сайті Реґіональной Ґорлицкой Телевізиі мож видіти інтервю пн. «Люде з Пасийом» з Данутом і Ваньом Дзюбинами, Лемками, котры ведут в Ґладышові Дзюбинівку – Лемківску Едукацийну Загороду. Оповідают они м.ін. о початках музею, одкале взяла ся думка створити загороду і чом як раз в такій формі веденый єст музей. Бесіда єст тіж о орґанізуваных в загороді варштатах, якы направлены сут не лем на молодіж, але і на тых старшых, а аж і тых найстаршых. Проґрам кінчыт ся коротком прогульком по Лемківскій Едукацийній Загороді і презентацийом хоснуваных колиси предметів.

Осінній номер часопису «Маґура» 

Вышол дальшый номер часопису «Маґура». Прочытате в ним м.ін. о 20-літю істнуваня Маґурского Нацийонального Парку, первістній бєщадскій бучыні, што была обнята проґрамом UNESCO, ци о обсервациі рідкого жука в Парку. Єст тіж статя о новій книжці Василя Баволяка пн. «Лемківскы приповідкы і приказкы зо Святковы Великой і околиц». На послідній страні публикациі традицийно найдете забаву для діти і дорослых з неочывидным розвязаньом. Часопис «Маґура» мож побрати на офіцияльным сайті Маґурского Нацийонального Парку. Мож тіж придбати друкувану «Маґуру», напримір в сідибі Парку в Крампній.

Подорож шляком творів артисты Єжы Новосільского

Полудник21- туристичне бюро, што діє в Варшаві, просит до участи в підляшскій прогульці шляком творів вызначного лемківского артисты Єжы Новосільского. В часі подорожы участникы будут обзерати роботы Новосільского, головні іконы і розписы м.ін. в церкви в Ґрудку, Гайнівці, на Ґрабарці ци в Ґродиску. Прогулька пройде 20. листопада/новембра, кошт выізду то 150 зл. плюс додатковы оплаты. Деталі находят ся на сайті туристичного бюра.

фот. GłogówNaszeMiasto