Сумар дня на 9. липця/юлия 2024 р.

Приносиме вам сумар медияльной ґрупы ЛЕМ.фм+ на ден 9. липця/юлия 2024 р.

55. Фестіваль Русиньской Культуры «Еха Волчых Гір»

Неодолга в русиньскым селі Влич на Словациі пройде 55. Фестіваль Русиньской Культуры «Еха Волчых Гір». Подія буде проходила в днях од 19. до 21. липця/юлия. Проґрам зачне ся в пятницю о 19.00 год. в Культурным Домі во Вличы вернісажом фотоґрафій Патрициі Ґоссаниі пн. «Поворот до минулости Полонин», котрому будут товаришыти гудобны гості: Полонина і Домініка Новотна. Дальше одпрезентуваный буде фільм «Полонины – Еха минулости Карпат”». Пак мож буде пообсервувати нічне небо з працівниками Выгорлятской Обсерваториі в Гуменным. Головный проґрам фестівалю пройде в суботу в ареалі при рыбнику во Вличы. Буде перегляд дітячых фольклорных колективів, проґрам з назвом «Мозаіка русиньского фольклору» – запрезентуют ся ансамблі: Русиньскє Тріо, Шамбрінці, Полонина, Стужіца і Сорочка, а на конец выступит Штефан Штець з ґрупом Файта. Пак буде забава з народном музиком при ватрі. Не бракне і додатковых атракций, такых як бесіды, выставы, ярмак, школа танця, ци кулінарный конкурс. В неділю в тамтышній грекокатолицкій церкви буде служена Літургія, а пак одбуде ся концерт духовной пісні Шамбрінців. Пополудни буде мож взяти участ в познавчій прогульці «Волчыма Горами».

XXXIV Православне Поломництво на Святу Гору Явір

Заран рушат XXXIV Православне Поломництво на Святу Гору Явір, котре орґанізує Братство Православной Молодежы перемышльско-ґорлицкой єпархіі з благословліня владыкы Паісия, архієпископа перемышльского і ґорлицкого. Поломництво буде тырвало три дни. Зачне ся в середу 10. липця/юлия о 9.00 год. од св. Літургіі при памятнику св. Максима і Жертв лаґру в Талергофі в Чорным. Дальше поломникы підут селами Долгє, Радоцина, Липна. Другого дня перейдут трасу зо Ждыні, через Реґєтів і Шквіртне до Ганчовы. В пятницю 12. липця/юлия празднуваня дня святых апостолів Петра і Павла поломникы зачнут од молебня в церкви в Ганчовій, а дальше перейдут до Высовой, де при церкви св. Архістратига Михала о 9.00 год. привитаны будут прибывшы єрархы. Пак вірны выйдут разом на святу Гору Явір, де о 10.00 год. буде служена Свята Літургія.

Змінил ся кінцевый термін реализациі «Сандеччанкы»

На «Сандеччанку» – одтинок державной дорогы нр 75 Бжеско – Новый Санч треба буде почекати долше як было перше обіцюване. На дорогу жытелі Сандеччыны ждут од років. Згідно з обітницями мала быти готова в 2028 р., а з початком 2029 переіздна. Проблем был порушеный на выіздовым засіданю Парляментарного Ансамблю до справ Малопольщы в Новым Санчы. Вшытко вказує на тото, што дорога буде в цілости переіздна аж в 2033 р. Проєкт єст в кінцевій фазі оціны. Фурт неє выданого середовискового рішыня – мало бы оно быти готове до кінця того рока.

Новы інвестициі в ґміні Крениця

Ґміна Крениця заверышла найновшы працы з проґраму для Звязку Креницко-Попрадскых Ґмін. В рамках так званой туристичной промесы были побудуваны пляжа над потоком, два пляцы забав і автобусовый простанок в Тыличы та вельофункцийне боіско в Полянах. Власти курорту надіют ся, што пляжа в Тыличы повторит успіх пляжы на Чорным Потоку в Креници. В припадку потока Мохначка не было інґеренциі в корыто і поглубліня. Пляжа має быти місцьом до рекреациі, котре притягне гости до Тылича. Кошт будовы пляжы і другых інвестиций то близко 2 млн 300 тис. злотых.