Сумар дня на 9. червця/юнія 2023 р.

Приносиме вам сумар медияльной ґрупы ЛЕМ.фм+ на ден 9. червця/юнія 2023 р.

«Лемківскє Літо» 2023

Припоминаме, што уж заран, в суботу 10. червця/юнія одбуде ся в Чмелю на Нижнім Шлеску дальша едиция подіі пн. «Лемківскє Літо», яка єст орґанізувана православном парохійом св. Тройці в Любіні. Як все, одбуде ся она на сельскым спортовым пляци. Зачне ся о 14.00 год. В проґрамі м.ін. выступы лемківскых і сусідскых ансамблів. В тым році на подіі выступит і ансамбль з Лемковины – бурсяна Терочка. Выступлят тіж м.ін. Ластівчата, Розтока, АПіТ Ліґниця ци Вороны. Окрем того буде мож покоштувати традицийны лемківскы стравы зрыхтуваны місцевыма ґаздынями, будут атракциі для діти, а тіж конкурсы лемківской співанкы і рецитациі.

ХХХІІІ Пішe Поломництвo на Святу Гору Явір

Ближыт ся ден святых Петра і Павла – свято, якє каждого рока притігат на Лемковину православных поломників. Традицийно, Братство Православной Молодежы Перемышльско-Ґорлицкой Єпархіі просит до участи в ХХХІІІ Пішым Поломництві Православной Молодежы на Святу Гору Явір. З благословліня архієпископа Паісия одбуде ся оно в днях 10.-12. липця/юлия. Поломництво зачне ся Літургійом в церкви св. Димитрия в Бодаках, пак поломникы перейдут через Бортне, Воловец і Криву до Ґладышова. Наступный ден зачне ся Літургійом в церкви Рождества св. Йоана Хрестителя, дальше поломникы підут через Реґєтів до Ганчовы, де в храмі Покровы Пресвятой Богородиці буде правлена святочна всеночна. 12. липця/юлия, в свято Первоверховных Апостолів Петра і Павла, в ганчівскій церкви рано одсуженый буде молебен, по якым поломникы перейдут до Высовы. В Высовій о 9.00 год. в церкви св. Архістратига Михала будут привитаны прибывшы єрархы, по чым вірны выйдут на верх св. Горы Явір. О 10.00 год. зачне ся там архієрейска Літургія. Участникы поломництва будут мати запевнене ідло, нічліг і транспорт баґажів, вписова оплата то 30 злотых. Зголошыня до участи в молодіжным поломництві принимат Фома Болех. Єст на то час до 5. липця/юлия.

Словация вызнала дальшу меншыну

Словация офіцияльно вызнала дальшу нацийональну меншыну. Вєтнамска меншына стала 14. офіцияльно вызнаном нацийональном меншыном Словациі. Статус тот вєтнамскій меншыні уділили словацкы власти 7. червця/юнія тр. Рішыня влады мало основу в рекомендациях Рады Влады Словацкой Республикы про людскы права, нацийональны меншыны і родову рівніст, котра рекомендувала вызнаня на основі фахового становиска Інституту Етнолоґіі і Социяльной Антрополоґіі Словацкой Академіі Наук. В остатнім списуваню жытелів з 2021 р. ґу вєтнамскій меншыні приголосили ся 2 793 особы, а 489 дало єй як дальшу нацийональніст. Більше на тоту тему прочытате в дописі на нашым портали.

Авторска стріча з Ярославом Ґємзом

Як подало выдавництво Лібра PL, явило ся нове, пошырене выданя альбому «Церкви і іконы Лемковыны» авторства Ярослава Ґємзы. В звязу з тым Нацийональнный Етноґрафічный Музей і Выдавництво Лібра PL просят на авторску стрічу тыкаючу альбому, яка одбуде ся в середу 14. червця/юнія о 20.00 год. в Нацийональным Етноґрафічным Музею в Варшаві. Публикация «Цекрви і іконы Лемковины» єст монументальным 700-станицьовым твором, в котрым комплетні представлена єст церковна артистична культура з обшыри Лемковины, вміщена в контекст руско-візантийской штукы. Нове выданя є пошырене о новый розділ «Давне, нове, привернене».