Сумар дня на 9. червця/юнія 2021 р.

Приносиме вам сумар медияльной ґрупы ЛЕМ.фм+ на ден 9. червця/юнія 2021 р.

Конференция духовенства православной Перемышльско-Ґорлицкой Єпархіі

Перед тыжньом, 3. червця/юнія, в православным єпархіяльным центрі в Ґорлицях прошла шторічна конференция духовенства Перемышльско-Ґорлицкой Єпархіі. По тым як представленый был справопис з жытя єпархіі, деканатів, ведіня реліґіі, діяльности братства молоджы, осередків Ельпіс і Елеос, бесідували о справах тыкаючых актуального стану єпархіі, особливо о ремонтах памятниковых храмів ци будові новых. Приняли ґрафік єпархіяльных торжеств, омовили проґрам поломництв на св. Гору Явір і до Ґорлиц. Архієпископ Паісий подякувал духовенству за службу Церкви, желаючы духовых і фізичных сил од Воскресшого Ісуса Христа в дальшым служыню. На закінчыня выслухали реферату зрыхтуваного отцями митратами Вєчеславом Янєльом і Йоаном Антоновичом пн. «Єдніст Христовой Церкви – наш скарб, ненавистный сатані, котрому горозит чловеча гордіст і непокора».

Грошы на борбу з зсувами ґрунту

Близко 100 тис. зл трафит до ґорлицкого повіту на борбу з зсувами ґрунту, котры створюют комунікацийну і інфраструктуральну загорозу, утрудняют доізд до шкіл ци місц роботы. Роками сут неактивны і припоминают о собі несподівано. Борба з осуваючом ся земльом то долготырвалый і повтаряючый ся процес. Того рока до малопольскых самоурядів трафит з цільовой резервы буджету державы веце як 7 млн зл. На обшыри ґорлицкого повіту зроблят стабілизацию осувиска в Ропі, на одтинку повітовой дорогы 1504К Ропа-Вафка-Фльоринка.

О назвах на Лемковині

Уж заран о 11.00 год. буде нагода брати участ в онляйновій прелекциі дра Войцєха Крукара на тему лемківской і бойківской топоніміі Низкого Бескіду і Бєщадів. Стріча проходила буде в рамках Номінариюм – ономастичных семінарів Польского Ономастичного Товариства і Працовні Ономастикы Інституту Польского Яызка Польской Академіі Наук. Доповід трансмітувана буде через плятформу ZOOM, охочы єй выслухати прошены сут слати зголошыня на майльовый адрес nominarium.poltowonom@gmail.com, жебы достати мотузок до стрічы. Про дра Крукара бесідуют, што назвал горы, зато што од парунадцетьох років веде соспільну документацию-реконструкцию традицийного теренового назовництва Бєщадів і Низкого Бескіду.

Част граничных переходів зас отворена

Од понеділька, 8. червця/юнія, зас отворены сут словацко-польскы граничны переходы в Татрах і на Підгали. Теперішній пандемічный стан спричынил, што власти зза полудньовой страны границі рішыли, по долгых місяцях, зас отворити граничны переходы в горах. Од 31. мая завдякы тзв. туристичному семафорови візд з Польщы на Словацию проходит на новых принципах. Без кварантанны можут віхати особы, котры скорше зареґіструют ся на сайті korona.gov.sk/ehranica, мают документ потверджаючый принятя вакцины, од котрого минуло 14 днів, хворіли на коронавіруса або мают менше як 18 років.

Фот. джерело: www.orthodox.pl