Сумар дня на 9. червця/юнія 2020 р.

Приносиме  вам  сумар  медияльной  ґрупы  ЛЕМ.фм+  на ден 9. червця/юнія 2020 р.

Цікаве розвязаня, для бетонового подвірця в Білянці

Мураль з бетону і липового дерева – здавало бы ся за барз абстракцийне, але не для Богдана Ґорчыці, артисты-різбяря з Білянкы, котрый уж кінчыт свою працу. Мураль прикрасит Біляньску філию Ґмінного Осередка Культуры, не так давно одновленого, але з єдном болячком – бетоновым подвірцьом. То як раз тота част осередка была найбільшым проблемом до заадаптуваня для директоркы філиі Ґражыны Яркєвич. Не давала тіж спокою локальному артисті Богданови Ґорчыци і так народила ся думка получыти природу з техніком, липу і бетон. Липовы дошкы змінили ся в прекрасны рельєфы, представляючы віз, липу, хыжу, церков, селян і поля, а над нима ангела. Цілый творчый процес, од думкы до кінцьового ефекту, тырвал близко рік. Тепер остало уж лем забезпечыти і замонтувати працы. Ціліст дополнят елементе з каменя і новый дах над експозицийом, уфундуваный через ґміну. В одновленій зоні найдут ся деревяны столикы і лавкы, будут тіж специяльны стоякы для роверистів.

Ретро потягом з Жабівкы до Нижньой Мшаны

В каждый вікенд липця/юлия і серпня/авґуста частю Ґаліцийской Желізниці з Хабівкы до Нижньой Мшаны, а може і до Касіны Великой, курсувати будут ретро-потягы, сформуваны з поіздів находячых ся в Скансені Желізного Табору в Хабівці. Переізды проходити будут забытковым потягом з паровом локомотивом і ваґонів сперед вісемдесятьох років. Цікавый є тіж пут переізду – Долина Рабы з Хабівкы через Рабку до Нижньой Мшаны ґварантує подорожуючум чудовый краєвид. На конечній стациі, вчас 45-минутового постою, мож буде дакус позвиджати, або спрібувати локальных страв. В серпни, кєд епідемічна ситуация дозволит, орґанізаторы продолжат переізд дальше – до Касіны Великой, єдной з найкрасшых та найвыже положеной желізничной стациі в Польщы. Гын, вчас постою, подорожыючы можут схоснувати медже інчыма креселкову ленію на Сніжницю, одкале мож подивляти краєвид Выспового Бескіду та Вєліцкого Погіря. Давні Ґаліцийскій Желізници Трансверсальній уж близко 135 років, а 77-кілометрова част того пути з Хабівкы, через Касіну Велику до Нового Санча, узнавана є за єдну з найбарже мальовничых желізничных трас в Польщы, аж і в Европі.

Підкарпатскы капличкы

Нацийоналный Маґурскій Парк просит на фотоґрафічну выставу пн. «Підкарпатскы капличкы», авторства Вацлава Турка. Выставу мож буде обзерати до 5. липця/юлия в Едукацийно-Музеальным Осередку Найцйоналного Маґурского Парку. Вацлав Турек то не лем фотоґраф, але тіж поета, а і музик. В 2017 році нагородженый Бронзовым Медальом Заслуженый Культурі GLORIA  ARTIS. Його выстава «Підкарпатскы капличкы» презентувана уж была в Австриі, Фінляндиі, на Литві, Словациі, Мадярах і Украіні.

6. едициі Кромер Біч Фестівал

В посліднім часі інформували сме о тогорічній новій формі 6. едициі Кромер Біч Фестівал, днес приносиме вам новы інформациі на тоту тему. Вчас тридньового фестівалю од 24. до 26. липця/юлия буде мож обізрити 7 концертів трансмітуваных нажыво не лем з Біча, але і Лондину ци Берліна. Высыланя мож буде обзерати на офіцияльных сайтах фестівалю, а завдякы спілпрацы з TVP Kultura тіж на загальнопольскій антені. Ведучым гаслом 6. едициі лишат ся «діялоґ», што має тіж навязаня до новой формы фестівалю і діялоґу медже артистами, орґанізаторами і обзераючыма через плятформы он-ляйн. Проґрам тогорічной едициі фестівалю находит ся на офіцияльным фейсбуковым сайті фестівалю.