Сумар дня на 8. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 8. жолтня/октобра 2024 р.

Рік 2025 Роком Русиньского Языка 

В пятницю 4. жолтня/октобра в Пряшові прошло 38. засіданя Округлого Стола Русинів Словациі (ОСРС), котре вюл председа орґанізациі Петро Штефаняк. В часі стрічы бесідувано о роботі веденій протягом рока в окремых комісиях ОСРС ци новых членьскых орґанізациях: сут то Общество святого Йоана Крестителя і Асоцияция Русиньскых Подникателів. Дискутувано тіж і о плянах на будучы рокы. В 2025 році Русины на Словациі припоминати будут 30 років од святочного выголошыня кодифікациі русиньского языка в Братиславі. З той нагоды ОСРС на своім засіданю рішыл, што рік 2025 буде Роком Русиньского Языка. ОСРС представит на початку 2025 рока лоґо ювілейного рока і заплянуваны активности, котрых цілю буде пропаґуваня і хоснуваня русиньского языка. В дальшій части стрічы члены выбрали функцийных на наступны два рокы. Додатково в часі засіданя члены ОСРС приняли рішыня про наступны крокы што до вырішыня проблему збірковых фондів, котры походят з русиньскых сел, а дотепер сут частю Музею Украіньской Культуры в Свиднику. Більше на тему засіданя чытайте на нашым портали.

Деревяны святыні на Підкарпатю зас выполнит музика

Фундация inCanto просит до участи в фестівалю «Rezonanse», котрый вертат на Підкарпатя, до деревяных церкви і костелів. Подія буде проходила од 11. до 13. жолтня/окртобра. В пляні находят ся концерты, выставы, звиджаня церкви ци тереновы гры, а вшытко в оточыню маєстатичных святынь зо Шляку Деревяной Архітектуры. Орґанізаторы в описі фестівалю звертают увагу, што цілю подіі єст наполнити святыні жытьом і музиком. Презентуваны творы то приміры давной, камеральной і сакральной музикы. Першы два концерты пройдут 11. жолтня/октобра в церковным комплексі в Радружы, будут то «Еха Візантиі» і концерт в темряві «Дай ся заскочыти!». При нагоді мож буде взяти участ в опроваджаню по выставі Школы Іконописаня з Радружа. 12 жолтня/октобра музику мож буде чути в церкви Народжыня Пресвятой Богородиці в Хотинци, товды тіж пройде теренова гра шляком деревяных церкви. Остатнього дня фестівалю орґанізаторы просят на звиджаня з провідником храму в Радружу і на спільну Службу Божу. Подія закінчыт ся двома концертами в церкви св. Параскєвы в Лувчы. Полный плян фестівалю находит ся на сайті фестівалю.

Выстава «Юрий Новосільскій – поворот домів» іщы лем через тыжден буде доступна для звиджаючых

Припоминаме, што іщы лем до 14. жолтня/октобра мож видіти выставу пн. «Юрий Новосільскій – поворот домів», презентувану в Ґалериі Штукы Двір Карвациянів в Ґорлицях, яка походит з колекциі Нацийонального Музею в Кракові. Єст то першый раз, коли творчіст Юрия Новосільского, знаменитого маляря, рисовника, сценоґрафа, але тіж теолоґа, а для вельох – найвыдатнійшого сучасного маляря ікон, єст шыроко презентувана так близко його рідной землі – лемківской Одреховой, одкале был отец Новосільского. Краєвиды Лемковины з єй архітектуром мож стрітити на вельох образах артисты.

Кычера рекрутує новых членів

Іщы до кінця жолтня/октобра тырвают записы до Лемківского Ансамблю Пісні і Танца «Кычера». Набір веденый єст в Ліґницкым Центрі Культуры. Молодіж выже 14 рока жытя може ся записати в пятницю о 17.00 год., зас діти в віку од 4 до 13 років в суботу о год. 10.00. Більше дрібниц што до набору находит ся на фейсбуковым сайті ансамблю.