Сумар дня на 8. жолтня/октобра 2020 р.

Приносиме вам сумар медияльной ґрупы ЛЕМ.фм+ на ден 8. жолтня/октобра 2020 р.

Громадяне Румуніі зберают лемківскы грибы в околицях Кривой, Вірхні ци Ґладышова

На обшыр Лемковины, што входит в склад ґорлицкого повіту, зас того рока приіхали грибяре з Румуніі. Штораз частійше жытелі сел, поблиз котрых громадяне Румуніі ходят по лісах, глядаючы грибів, сут занепокєны цілом ситуацийом. По перше зато, што не знатя, ци леґальным є, жебы чужынці зберали велику кількіст грибів з польскых і лемківскых лісів, і ци дозволене є свобідне ходжыня по лісах. По другє, жытелі сел задумуют ся, ци побыт громадян Румуніі єст леґальный і ци не мают они злых замірінь взглядом жытелів. Як пояснила ґорлицка поліция, румуньскы грибяре сут громадянами Европейской Уніі і мают право приізджати і быти на обшыри Польской Республикы, а тым самым хоснувати державны лісы. Очывидно кєд входят на приватны ділянкы, повинны мати згоду властителів. Як дальше інформує поліция, хоц было пару зголошынь од жытелів спомненой обшыри, не найдено ани єдного припадку злочыну зо страны чужынців. В остатніх днях румуньскых громадян виділи в околицях Кривой, Вірхні ци Ґладышова, а влони тіж в околицях Смереківця.

Святочне засіданя СКУтНіЕМ за нами

Вчера, 7. жолтня/октобра, одбыло ся дальше засіданя Спільной Комісиі Уряду та Нацийональных і Етнічных Меншын Польской Республикы. Подля доступных інформаций, ден перше, в віторок, 6. жотлня/октобра, представникы меншын стрітили ся на робочій стрічы. Вчерашнє засіданя СКУтНіЕМ посвячене было 15-літю фунґуваня Комісиі. На засіданю меншыновой страны Комісиі бесідувано м.ін. про справу одповіди уряду на документ пн. «Нацийональны і етнічны меншыны – найважнійшы проблемы середовиска нацийональных і етнічных меншын», а тіж о меншыновій ситуациі в добі пандеміі коронавіруса. Представникы меншын дискутували і про систем онляйн до складаня внесків о дофінансуваня ґрантів. Порушена была тіж справа знищыня цмонтеря старообрядовців в Бялоґурах.

Пандемія коронавірса што раз більша

Коронавірус не одпущат, ани в Польщы, ани на Словациі. Новосандецкій повіт находит ся актуально в тзв. жолтій зоні, хоц не знатя, ци неодолга не буде закваліфікуваный до червеной зоны. В цілій Польщы каждого дня збільшат ся чысло хворых і вмерлых з причыны заражыня коронавірусом. Не ліпше єст на Словациі. Примірово в Бардийові в понедільок заперто вшыткы школы. Рішыл о тым о містецкій кризисовый штаб на своім вынятковым засіданю. Вчыня в школах покля што было стримане на десят робочых дни. Рішыня было спричынене рекомендацийом окресного епідемійолоґа.

В Пряшові мож видіти выставу присвячену ІІ світовій войні

Тыжден тому на ул. Главній в Пряшові была одкрыта выстава о II світовій войні. Навязує она до концепту попередніх путовных експозиций громадского здружыня Post Bellum. Іде о 15 оповідань люди, котры пережыли ІІ світову войну. Профілі осіб, котры перешли через воєнне пекло, сут вміщены на великых транспарентах на штырьох вежах. Автором портретів єст фотоґраф Томаш Галасз, автором ґрафікы з назвом «Бойовник проти фашызму» є Матуш Матятко. Медже героями выставы находят ся такы люде як наприклад Марта Сзулардова, котра пережыла концентрцийный лаґєр Аушвіц-Біркенау і похід смерти. На выставі находят ся лиця і інчых осіб, часто заслуженых для словацкой і европейской культуры, якы бороли ся проти фашызмови. Выстава буде доступна на улицях Пряшова до 30. жолтня/октобра. Єст реалізувана з фінансовом підпором Міністерства Справедливости Словацкой Республикы.