Сумар дня на 8. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 8. вересня/септембра 2022 р.

Будапешт буде центром русиністикы

В днях од 15. до 18. вересня/септембра Будапешт буде центром світовой русиністикы. В тых днях зыйдут ся науковці, котры занимают ся русиністиком, але і гості, котры репрезентуют Русинів в окремых державах, на медженародній конференциі під назвом «Світова русиністика днес: вопросы теориі і практикы». Конференцию орґанізує Русиньскій Науковый Інститут ім. Антония Годинкы і пленарны засіданя будут проходити 16. і 17. вересня/септембра. Першый ден будут рефераты в просторах мадярского парляменту. Другій ден конференция перенесе ся до резиденциі Вседержавного Русиньского Самосправуваня (ВРС). Подію одкрыє Іштван Шімічко, председа фракциі KDNP Парляменту Мадяр. Слово буде мал тіж Віктор Крамаренко, шеф ВРС, як і Михаіл Капраль, директор Інституту ім. А. Годинкы. В суботу на конференциі выступит Віра Ґіріц. Своі рефераты прочытают русиністы з Мадяр, Словациі, Украіны, Сербіі і Японіі. Будут они тыкати языка, літературы і істориі Русинів.

В Ґорлицях прошли шторічны торжества в памят священномученика Максима Ґорлицкого

В понедільок і віторок (5. і 6. вересня/септембра) в ґорлицкым катедральным храмі проходили торжества повязаны зо споминаньом священномученика Максима Ґорлицкого. На запрошыня владыкы Паісия, архієпископа перемышльско-ґорлицкого участ в богослужынях взяли єрархы Украіньской Православной Церкви – митрополита Алексий і архієпископ Віктор. В ден праздника, 6. вересня/септембра, літургію служыл так само архієпископ Авель, владыка люблиньско-холмской єпархіі. До Ґорлиц пришли поломникы не лем з Лемковины, але і з Підляшя та з дальшых держав, такых як Словация ци Чешска Республика. Не бракло і поломників з Украіны – біженців, якы мусіли лишыти рідну землю в звязку з аґресийом Росиі на украіньску державу. Владыка Паісий дякувал присутным єрархам УПЦ за присутніст і долучыня ся до молитвы в чест першого лемківского святого, о. Максима Сандовича.

Чырч хоче розбудувати школу

В селі Чырч в окресі Стара Любовня хотят розбудувати школу. Простір основной школы з предшкольом уж не старчат. Село хоче великіст розшырити розбудуваньом обєкту, што бы ся мало фінансувати з еврофондів. Школярі другой ступени мусят тепер доходити до шкіл в селах околиці. Подібна ситуация є подля старосты Михала Дідика в многых селах Словациі. Чырч плянує выбудувати три новы клясы, але і клясы для фахового вчыня другой ступени. В минулости школа в Чырчу уж перешла частичну реконструкцию. Вдяка дотациі в сумі 320 тис. евро самосправа перед штырьома роками уж розшырювала предшколя. Збільшыня чысла жытелів і діти село приписує м.ін. будуваню новых арендованых мешкань.

Неодолга выборы во Свиднику

Неодолга на Словациі будут проходити выборы. В осінніх самоурядовых выборах на посаду пріматора міста Свидник кандидувати будут штырі особы. З підпором партий Hlas-SD, Sme rodina і KDH кандидує теперішня пріматорка Марцеля Іванчова. Як незалежны будут кандидувати Катерина Сивакова, Ян Воок і добрі знаный Русинам, Мілош Стрончек. О 15 посланецкых кресел буде ся бороло во Свиднику 31 кандидатів, котры ідут до выборів як незалежны, або як кандидаты політичных партий і коаліций. Інформувало о тым місто Свидник.