Сумар дня на 8. мая 2020 р.

Приносиме вам сумар медияльной ґрупы ЛЕМ.фм+ на ден 8. мая 2020 р.

Зас мож піту на пораду до дохтроя

Найбільша в ґорлицкым повіті специялистична амбулятория, котра діє при ґорлицкым шпытали, зас принимат пациєнтів. Дохторскы візиты проходят што 15 минут, жебы не спричыняти громаджыня ся в ізбі, де ся жде, і жебы встугнути дезинфекувати поміщыня по каждым пациєнті. Тоты, котрым дохторска порада пропала в часі од 16. марця до 28. квітня/апріля, будут телефонічні прошены на інчый термін. Добесідуваны пациєнты можут войти на обшыр осередка здоровля на 5 минут перед плянуваном візитом, необхідне є носити маску і дезинфекувати рукы. Помалы вертают роботу вшыткых одділінь самого шпыталя, а од вітірка діє уж пункт побераня в шпытальній лябораториі. Окрем того до ґорлицкого шпыталя трафлят два авта скорой допомогы перезначены выключні до несіня помочы зараженым коронавірусом. Малопольскє воєвідство купило в сумі такых авт 50 на цілу свою обшыр, першы дедикуваны поізды выіхают уж 15. мая, дальшы будут готовы в наступных місяцях. Закуп авт скорой допомогы фінансуваный є з унійных середків.

Троє зараженых в Рудній

КҐГМ Польска Мід поінформувало перед двома днями о трьох робітниках компаніі з Копальняных Закладів Рудна з потвердженым заражыньом коронавірусом. Мужчыны згідні з процедурами сут на кварантанні. КҐГМ од вельох тыжнів веде превенцийны діяня цілю охороны робітників перед заражыньом – во вшыткых спільных просторах ведена є дезинфекция, до копален і гут трафил біоцидный плын власной продукциі, а перед входом до одділінь замонтувано термовізийны системы. Покля што вшыткы процесы і проєкты в КҐГМ проходят без змін. На даны з вчера в цілым Нижньошлезскым воєвідстві є 1789 зараженых, вмерло 57 осіб. В Польщы хворых на Covid-19 єст близко 15 тис. Выздоровіло близко 5 тис. осіб, вмерли 733. На світі потвердженых зараженых є близко 3 млн 825 тис.

В Радваницях вшыткы почуют про Лемків

Од вересня/септембра тр. в Радваницях реалізувати будут проєкт пн. «Тот світ не загынул – будут называти нас Лемками», якій фінансуваный єст Фондом Орлен. Його релізатором єст місцевый Шкільно-Предшкільный Комплекс, а координаторком Дорота Максимчак, учытелька лемківского языка в тій школі. Акциі проєкту заплянувано так, жебы приємніст з участи мали діти, родиче і дідове. Як першый заплянувано Лемківскій Пікнік над озером Глубокє, в рамках котрого пройде родинный конкурс, в котрым треба буде выказати ся знаньом лемківской культуры. В листопаді/новембрі школяре будут презентувати рецитаторскы, співочы та малярскы здібности в рамках конкурсу «Лемківска Осін в Радваницях». Кульмінацийом проєкту буде великій різдвяный концерт, в часі котрого вызвучат лемківскы і польскы коляды. Выступлят школяре з Радваниц і Бучыны, хоры з обох місцевых парохій – католицкой і православной, а тіж ансамблі: Ластівочка з Пшемкова і народный ансамбль Своякы з Радваниц. Послідньом подійом проєкту будут варштаты писаня ікон, якы заплянувано на марец 2021 рока.

Отвертя басену в Высовій іщы пізнійше

Головна інвестиция ґміны Устя Рускє, значыт басен в Высовій є запертый од рока і такій остане іщы долго, хоц мали го оддати до кінця липця/юлия тр. В маю 2019, по семох роках од одкрытя, рішено закрыти обєкт з технічных причын – ушкоджена была конструкцийна система будинку. Експертиза выказала товды м.ін. значучу деформацию желізобетоновой повалы, розбитя стін і повалы ци вільгіт в підземній части обєкту. Ориґінальный плян был такій, што вшыткы дефекты поведе ся усунути до половины вакаций. Вказує ся, што потрібны сут дальшы ремонты, а передвидуваный термін одданя басену то жолтен/октобер. Дальшы роботы обнимают м.ін. дотепліня басеновой чашы, жебы надмір тепла не громадил ся докола даху, што молго бы шкодити конструкциі. Хоц басен был закрытый, воду тримали долгы місяці, што ґенерувало кошты. Тепер повело ся тото змінімалізувати – басен єст порожній, забезпечено і систему фільтрів. Власти ґміны не выключают, што в будучности будут арендувати обєкт або го продадут. Покля што неє іщы конкретных пропозиций.