Сумар дня на 8. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 8. лютого/фебруара 2024 р.

Стріча посвячена істориі Руской Народной Республикы Лемків

Як інформує нашу редакцию еміґрацийный лемківскій діяч Андрий Медвід, Карпаторусиньскій Америцкій Центр «Lemko Hall» (Carpatho-Rusyn American Center Lemko Hall) в Йонкрес, ЗША, 10. марця орґанізує подію присвячену істориі Руской Народной Республикы Лемків (1918-1921). Подія одбуде ся в Йонкрес, а зачне ся о 13.00 год. в парохіяльных просторах місцевой православной церкви. Акция має мати форму дискусиі, але головну доповід на тему істориі фльориньской Республикы даст др Богдан Горбаль, єден з теперішніх діячів реактивуваного Лемко-Союза. Вступне на подію дармо. Орґанізаторы просят, жебы поінформувати іх скорше о своій участи, пишучы на майль: lemkohall@yahoo.com.

Новый пряшівскій владыка завитал до рідной Ольшавиці

До свого рiдного села Ольщавиця в левочскым окресі на Словациі завитал в неділю 4. лютого/фебруара Высокопреосвященый Йона Максим, новопоставленый архієпископ митрополита пряшівскій, жебы одслужыти в місцевым храмі першу свою архієрейску літургію. Брали в ній участ предовшыткым священникы з попрадского протопресвитерияту, но з митрополитом служыли і духовны з другых парохій. В богослужыню молили ся вірны з Ольшавиці і інчых русиньскых сел околиці – м.ін. Нижні Репашы, Торискы, Штельбах. В проповіди, котру выголосил владыка Йона, участным приговорил ся як тот, котрый є єдным з них. «Пришол єм до вас як ваш родак. Пришол єм, жебы-м благословил» – бесідувал владыка. Єпарха навязал і до істориі села, його слабости, але і добрых моментів. По літургіі в культурным домі одбыл ся святочный обід. Артистичный проґрам збогатила Фольклорна ґрупа «Ялника».

Пряшівскы фашенґовы свята

Центр міста Пряшів ожыє уж заран, в пятницю популярныма на Словациі фашенґовыма святами, котры орґанізує місто вєдно з Парком Культуры і Оддыху. Того рока представит ся девят фольклорных колективів з Пряшівского Краю, котры своім танцьом, співом і вінчуванями переведут участників історичным центром міста. Завершыньом святкуваня буде фашенґова забава – інформувало о тым місто Пряшів на своім офіцияльным вебсайті. Участникы пряшівскых фашенґовых свят можут тішыти ся і на добре ідло, котре на тот період перед початком Великого посту ся належыт.

В Польковицях розвивают здравотну профіляктику

Як інформує ґміна Польковиці, єй жытелі можут безплатно корыстати з проґрамів здравотоной профіляктикы. «З серцьом до жытелів» то пакєт проґрамів, котры мают забезпечыти дбаня о здоровля. Як бесідувал Лукаш Пузнєцкій, бургомайстер Польковиц, здоровля жытелів є пріоритетом для ґміны, прото уж дальшый рік ґміна фінансує проґрамы здравотной профіляктикы. Того рока десят проґрамів і сім здравотных задач реализує Польковицкій Центр Здравотных Услуг. Як зазначат презес ПЦЗУ Павел Ґамбаль, з проґраму годен корыстати каждый жытель ґміны. В рамках проґрамів мож ся бадати м.ін. в рамах профіляктикы вынаходжыня раковины.