Сумар дня на 8. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 8. лютого/фебруара 2022 р.

«(…)Польща єдностранні зрезиґнувала з дорогы діалоґу»

Проф. Бернд Фабрітюс з Німец, федеральный полномічный дс. выселенців і нацийональных меншын, пришол вчера до Ополя стрітити ся з представниками німецкой меншыны. Цілю стрічы было побесідувати про ситуацию звязану з ограничыньом чысла годин вчыня німецкого языка, котре вошло в жытя вєдно з розпоряджыньом міністра едукациі Пшемыслава Чарнка з пянтиці 4. лютого/фебруара. В примірі решты меншын чысло годин языка то дальше три лекцийны годины. На офіцийным сайті Союзу Німецкых Соспільно-Культурных Стоваришынь помістили тіж коментар німецкого помномічного уряду в тій справі. Мож в ним прочытати, што «тридцет років по принятю трактату медже Федеральном Республиком Німец а Польском Республиком про добре сусідство і приязну спілпрацу, Польща єдностранні зрезиґнувала з дорогы діалоґу». Пономічный заапелювал о як найскорше дальше передуманя і розсмотріня того рішыня.

«Курорт Золоцкє»

Бургомайстер Міста і Курортной Ґміны Мушына выступил до міністра здоровля з внеском надати статус окремого курорту шолтыствам Золоцкє, Щавник і Астрябик, лемківскым селам, якы находят ся на обшыри ґміны Мушына, а котры актуально находят ся в границях курору Мушына. Проєкт розпоряджыня Рады Міністрів в тій справі закладат, што новый курорт буде мал названя «Курорт Золоцкє» і в його склад войдут скорше вымінены села. На обшыри курорту выступуют засобы лікуючой, мінеральной воды. Климат курорту може быти хоснуваный до лікуваня м.ін. хворіт системы травліня, ревматоідальных хворіт, хворіт выжніх і нижніх дыхальных доріг ци ендокринолоґічных хворіт. Уж тепер на обшыри курорту Золоцкє діє санатория, в котрій проходит лікуваня в рамках м.ін. бальнеотерапіі, кренотерапіі, водолікуваня, світлотерапіі, електротерапіі, термотерапіі, інгаляциі ци кінезотерапіі. Документ передано 28. січня/януара до соспільных консультаций.

Коли выкупаме ся в санківскых басенах?

Ґміна Санкова плянує заінвестувати коло 16 млн зл в ґеотермально-рекреацийный комплекс, котрый стане в сусідстві місцевого боіска. Значуча част грошів то фінансуваня од уряду влады. Війт ґміны Малґожата Малух плянує, што одкрытя басенів пройде не пізнійше як в 2024 році. В половині лютого/фебруара має быти готовый функцийонально-практичный проґрам, а найпізнійше в марци, на його основі, буде оголошеный конкурс в трибі запроєктуй-выбудуй. Іщы не знатя, ци того рока поведе ся провести даякы зовнішні роботы, ци лем тоты, што звязаны з проєктуваньом. Санківска інвестиция складала ся буде з двох части. Перша, реализувана ґміном, то будова басену, поділеного на зовнішню і задашену част з шатнями, санітариатом, сауном і джакузі. Другом частю інвестициі є гыбридова ґеотермальна інсталяция, яка буде засиляла басены в теплу воду. Подля міністерияльных заповіди має то быти получыня ґеотермального верчыня, помп тепла і солярных панелів.

Біциґльову стежка в Старій Любовни

Стара Любовня на своім вебсайті поінформувала, же влони повело ся в місті докінчыти біциґльову стежку, котрой прямым продолжыньом бы мала быти траса аж до Новой Любовні з прилучыньом до уж істнуючой біциґльовой стежкы до Любовняньскых Купелів. В будучности Стара Любовня буде мала роверову трасу і до русиньской Орябины. Село выстарало ся о фінансуваня, зачали уж і проєктовы роботы на тій трасі. Власти міста надіют ся, што нова стежка буде так само популярна як істнуюча траса Стара Любовня-Гнієзнде, котру хоснуют роверисты каждой ґенерациі. Місто на уж істнуючых трасах рыхтує дальшы выліпшыня і розшыріня, хоче тіж побудувати скейтпарк і пумптрак для біциґлистів.