Сумар дня на 8. липця/юлия 2021 р.

Приносиме вам сумар медияльной ґрупы ЛЕМ.фм+ на ден 8. липця/юлия 2021 р.

Нова «Бесіда»

Явил ся друком дальшый номер часопису Стоваришыня Лемків – «Бесіда», ч. 3 (180) за місяці май/червец 2021 р. Чысло, подібні як два попередні, припоминат нам о тырваючым Нацийональным Повселюдным Списі і кличе нас до гордого декляруваня нашой нацийональности. Часопис явил ся такой в передден ІХ Конґресу СЛ і на два місяці перед ХVI Конґресом Русинів, якій одбуде ся 10.-11. вересня/септембра 2021 р. в Креници. В тым выданю прочытаме м.ін. статі Андрия Ковальского, Петра Трохановского, Наталиі Малецкой-Новак, Ваня Дзядика ци Анны Кырпан. Окрем спомненых дописів, очы чытача тішат конкурсовы оповіданя молодых і здібных учеників лемківского языка. В части «Одышли од нас / Попращали мы» Петро Трохановскій споминат особу покійного Павла Стефановского, выдатного лемківского діяча, писменника, політика і етноґрафа, якій вмер під конец марця тр.

Премєра в ТАД

На заран, 9. липця/юлия, русиньскій Театр Александра Духновича в Пряшові рыхтує премєру приповідкы «Цар пав». Головну ролю заграт Ладіслав Ладомиряк. Приповідку полну музикы приготовила Зузана Ґалкова. «Цар пав» є на мотивы мадам д‘Ульнуа, котра в ХVII ст. позберала і обробила приповідкы, котры людe бесідували собі на французскых селах. Окрем Ладомиряка в ролях представлят ся Зденка Кваскова, Владимір Рогач, Мартин Оравец, Осиф Пантликаш, Ярослава Сисакова в альтернациі з Владиміром Штефаніковом, Івета Фейкова і Михал Куцер. «Цар пав» єст 385. премєром Театру Александра Духновича в його 75. сезоні. Премєра по русиньскы одбуде ся на Великій Сцені ТАД о 17.00 год.

Амуніция в Полаті

В русиньскым селі Полата, што лежыт на граници Пряшівской Руси і Лемковины, 6. липця/юлия 52-річный лісник нашол при огляді ліса воєнну амуніцию. Як інформувала пак пряшівска поліция, ішло о сім ґранатів з часів ІІ світовой войны, што і потвердили войсковы саперы. Амуніция была взята на ліквідацию. Того рода амуніцию што якісый час находят і на Лемковині – посліднім разом в Розділю, де была модернізувана дорога.

Перед нами XVI Світовый Конґрес Русинів

Як сме уж інформували, в остатню суботу в Ліґници одбыл ся ІХ Конґрес Стоваришыня Лемків. Тепер перед Стоваришыньом дальша важна подія – орґанізация ХVI Світового Конґресу Русинів, якій тым разом одбуде ся в нас – на Лемковині. Як подал ведучый СЛ, Андрий Копча, ХVI СКР буде зорґанізуваный в Креници в днях 10.-11. вересня/септембра 2021 р. Стоваришыня Лемків як членьска орґанізация Конґресу тым разом буде гостила на Лемковині Русинів з інчых держав світа. В рамках Конґресу окрем формальных справ, як выборы новых власти, одбудут ся вшелеякого рода культурны подіі. Наше радийо ЛЕМ.фм хоче так само при нагоді Конґресу одсвяткувати своє 10-літя. О дрібницях будеме іщы інформувати.