Сумар дня на 8. липця/юлия 2019 р.

Приносиме Вам сумар медияльной ґрупы лем.фм на ден 8. липця/юлия 2019 р.

Першый ден засідань XV. Світового конґресу Русинів в Любовняньскых Купелях

Одспіваньом словацкого гымну “Над Татром ся блискат”, русиньского гымну “Я Русин был, єсм і буду” і европейского гымну зачал ся в минулу пятницю, т.є. 5 липця/юлія, XV Світовый Конґрес Русинів. Делеґациі русиньскых орґанізаций зышли ся до Любовняньскых Купели на Спишы. Орґанізатор конґресу і предсідатель Русиньской Оброды на Словациі, Мартін Караш, привитал вшыткы делеґациі поєдных членьскых держав, гостів, а особливо членів уряду влады Словацкой Республикы, членів самоурядовых власти і посланку до сербского парламенту Олену Папуґу. Дале дотеперішній ведучый Світовой Рады Русинів др. Штефан Лавинец проголосил офіцийне одкрытя XV Світового Конґресу Русинів. З писмом до участників конґресу обернула ся Зузана Чапутова, президентка Словацкой Республикы. Было прочытане і писмо од премєра уряду влады Слловацкой Республикы, в якым деклярувана была підпора Русинам зо стороны уряду влады. В рамках першой святочной части конґресу предсідатель Світовой Рады Русинів Штефан Лявинец передал Премію Василя Турока – Гетеша і почестны грамоты за розвиваня русиньской культуры для долгорічной редакторкы русиньской періодичной і неперіодичной пресы Анны Кузмяковой та русиньского історика, Івана Попа. Світовый Конґрес Русинів закінчыл своі пленарны засіданя в минулу суботу вечером. На дальшу дволітню каденцию шефа Світовой Рады Русинів был выбраный др. Штефан Лявинец з Мадяр.

Святкуваня культуры Лемків–Русинів 2019 в Купелях Червеный Кляштор на Словациі

21 липця/юлия т.р. в Купелях Червеный Кляштор на Словациі одбудут ся святкуваня культуры Лемків–Русинів 2019. Вказаны будут звикы, музика а і реґіональна ґастрономія. Проґрам зачне ся о 12 год. грекокатолицком Божественном Літургійом, вчас котрой співал буде грекокатолицкій церковный хор Арханґелікос з Попраду. Фольклорный проґрам «З Русиньского серця» зачне ся о 14.30 год. Выступлят Мариянна Железна, фольклорны ансамблі Рутенія і Барвінок, фольклорна ґрупа Майдан та гіст з Лемковины. О 18 год. вчас ґаляпроґраму, де не бракне доброй забавы і гумору, выступит Мариян Чековскій з капельом і ґрупа Дрішляк.

Музеальне Свято «Од Русаль до Яна» в Зындрановій

По долшій перерві Музей Лемківской Культуры в Зындрановій зас просит на Музеальне Свято «Од Русаль до Яна», котре одбуде ся в днях 27.-28. липця/юлия т.р. в Зыднрановій. Одкрытя подіі одбуде ся в суботу, 27. липця/юлия о 16 год. Того дня буде презентация книжок і авторскы стрічы пн. «Музеальна Загорода». Валерій Падяк оповіст о карпаторусиньскій літературі. Віолетта Міхналь о діяльности Лемків по 1989 р. Буде і доповід Кжыштофа Касперчыка п.н. «Моя Лемковина». О 18 год. пройде концерт ансамблів Гудакы та Рокаш. Дальше, буде показ сляйдів п.н. «Лем – вкрыта краіна», а пак огниско і забава. В неділю, 28. липця/юлия о 13 год. зачнут ся выступы ансамблів Ручай, Капелі Дуклянє, сольовый проґрам Юлиі Дошны з акомпаніяментом Мирослава Боґоня, выступлят і Ославяне, Ганця і Славко, фольклорна ґрупа Топлян, Веселы Невісты, Циґаньскы Бароны і Капеля спід Рубані. Будут тіж конкурсы і забавы, показы ремесла, рукоділа і народной штукы та реґіональны стравы.

«Шлезакы Лемкам» – Медженародна Фолькова Забава в Бортным

12 липця/юлія т.р. в сельскій світлици в Бортным пройде Медженародна Фолькова Забава орґанізувана в рамках подіі о наголовку «Шлезакы Лемкам». Подія зачне ся о 17 год. Выступлят Шлезскы фольковы музикы та лемківскій ансамбль НАДІЯ. Буде і можливіст взяти участ в лекциі танця, котру поведе водитель фольковых танців, Марта Бреян. Зрыхтуваный буде почастунок для вшыткых гости. Патронами імпрезы сут Президент Сємяновіц – Рафал Пєх, і Війт Ґміны Санкова – Малґожата Малух.